Þorsteinn Már Baldvinsson, forstjóri Samherja, efast um að Már Guðmundsson seðlabankastjóri hafi nokkurn tímann íhugað að fara með mál Samherja í sáttaferli.

Már lét þau orð falla í þættinum Sprengisandi á Bylgjunni í gærmorgun að hann hefði rætt um að setja mál Samherja í sáttaferli áður en fyrirtækið var ákært fyrir brot á gjaldeyrislögum í fyrra skiptið en að hæstaréttarlögmaður hefði komist að þeirri niðurstöðu að hann mætti það ekki. Honum bæri skylda til að leggja fram kæru ef grunur léki á því að alvarlegt brot hefði verið framið.

„Ég held að það hafi ekki hvarflað að honum nokkurn tímann að fara í sáttaferli,“ sagði Þorsteinn. „Ég bið hann annars að leggja fram þau lögfræðirit um málið sem sanna það.“

Samherji undirbýr nú skaðabótamál á hendur Seðlabankanum, sem Þorsteinn telur hafa rekið málið gegn Samherja af illum vilja. Þorsteinn segir að yfirlýsing Más breyti engu um áætlanir hans. Hæstiréttur Íslands staðfesti 8. nóvember síðastliðinn dóm Héraðsdóms Reykjavíkur þar sem ákvörðun Seðlabankans frá árinu 2016 um að Samherji skyldi greiða 15 milljónir króna í sekt til ríkissjóðs var felld úr gildi. „Viðbrögð Más við því eru í samræmi við annað sem frá honum hefur komið,“ segir Þorsteinn í umfjöllun um þetta mál í Morgunblaðinu í dag.

Tengdar fréttir

Samherji

Samherji hafði betur gegn Odee

• Hafa fjarfest meira en nemur hagnaði
• Fyrrverandi starfsfólki „sé haldið í spennitreyju“
• Þúsundir smáskilaboða fundust í tölvu
• Sumarstarfsmenn gegna lykilhlutverki hjá ÚA

» Fleiri tengdar fréttir