Meðal þess sem fram kemur í niðurstöðum skýrslu, sem viðræðurhópur um samgöngur á höfuðborgarsvæðinu skilaði til ráðherra samgöngu- og sveitarstjórnarmála og Samtaka sveitarfélaga á höfuðborgarsvæðinu 19. nóvember, er að svo draga megi úr umferðarteppum þurfi að bæta flæði umferðar á ákveðnum gatnamótum og breyta ferðavenjum.

„Með óbreyttum ferðavenjum til 2030 mun umferð bíla aukast um 40% en með breyttum ferðavenjum aðeins um 24%. Breyttar ferðavenjur eru að fleiri ferðist með almenningssamgöngum, hjólandi eða gangandi. Þá er horft til þess að ef Ísland á að geta mætt alþjóðlegum og innlendum skuldbindingum sínum um að draga úr útblæstri gróðurhúsalofttegunda þarf að breyta ferðavenjum,“ segir í skýrslunni.

Fyrir vikið sé Borgarlínu raðað framar í forgangsröð samgönguáætlunar en áður hafi verið gert. „Þá er jafnframt áhersla hjá viðræðuhópnum á mikilvægi þess að á meginstofnvegunum Reykjanesbraut frá Sundabraut til Suðurnesja og Vesturlandsvegi frá Reykjanesbraut og norður úr ásamt Suðurlandsvegi frá Vesturlandsvegi og austur úr sé sérstaklega hugað að greiðu og öruggu flæði einka- og þungaumferðar.“

Framkvæmdir vegna Borgarlínu á fullt skrið 2021

Hópurinn leggur til stofnvegaframkvæmdir á höfuðborgarsvæðinu sem áætlað er að kosti 50 milljarða króna. Meðal annars að hluti Miklubrautar verði settur í stokk og Hafnarfjarðarvegur í Garðabæ. Hvað Borgarlínu varðar er gert er ráð fyrir að ríkið veiti 300 milljóna króna framlagi til undirbúnings og framkvæmda vegna hennar á næsta ári og 500 milljóna króna árið 2020 gegn sambærilegu mótframlagi frá sveitarfélögunum.

Gert er ráð fyrir að framkvæmdir við Borgarlínu geti verið komnar á fullt skrið árið 2021 og er lagt til að á fyrsta tímabili samgönguráætlunar, 2019-2023, verði lokið við fyrsta hluta fyrsta áfanga uppbyggingar innviða hennar frá Ártúni að Hlemmi um Voga, Suðurlandsbraut/Laugaveg og frá Hamraborg að Hlemmi yfir Fossvog um miðborg. Heildarfjárfesting ríkis og sveitarfélaga vegna þess verkefnis verði um 16,3 milljarðar króna.

Heimilt verði að innheimta innviðagjöld og veggjöld

Þá leggur viðræðuhópurinn til að lokið verði við fyrsta áfanga Borgarlínu á gildistíma 15 ára samgönguáætlunar. Sameiginlegur heildarkostnaður ríkis og sveitarfélaga við þann áfanga er ráðgerður 42 milljarðar króna. Ennfremur leggur hópurinn til að 1,5 milljörðum króna verði ráðstafað í stofnstígaframkvæmdir á höfuðborgarsvæðinu á tímabilinu 2019-2023 fyrir gangandi og hjólandi umferð. 

„Starfshópurinn leggur til að leitað verði nýrra leiða til fjármögnunar framkvæmda við uppbyggingu innviða Borgarlínu. Þannig er lagt til að sveitarfélögum verði tryggð heimild til innheimtu innviðagjalda auk þess sem innheimta veggjalda á höfuðborgarsvæðinu verði útfærð. Þá sé eðlilegt að líta til hækkunar kolefnisgjalda og þeirra markmiða sem þeim er ætlað að ná við ráðstöfun fjármuna til Borgarlínu.“

Tengdar fréttir

Veggjöld

„Borgarlína fjárhagsleg martröð“

• Höfuðborgin sniðgengin í fyrri áætlun
• Kostar tugi milljarða
• Mun kosta um 10 milljarða
• Vill skoða Keldnaland undir nýjan spítala

» Fleiri tengdar fréttir

• Blogga um frétt