Þurftu að finna einhverjar lausnir

„Við höfðum svolitlar áhyggjur af þessu, létum prófa þetta og það gekk vel,“ segir Guðmundur Heiðar Helgason upplýsingafulltrúi Strætó. Breytingar verða á leiðakerfi Strætó í byrjun næsta árs en tvær leiðir munu keyra þröngar götur miðbæjarins vegna lokunar gömlu Hringbrautar.

Skipt verður í nýtt leiðakerfi Strætó 6. janúar.

Fram kom í tilkynningu frá Strætó í morgun að í janúar mun hluti gömlu Hringbrautar loka í sex ár vegna framkvæmda á nýjum Landspítala. Lokunin mun hafa nokkur áhrif á leiðakerfi Strætó en eins og Guðmundur segir hefur gamla Hringbrautin verið hálfgerð slagæð Strætó. 

Frétt af mbl.is

Loka gömlu Hringbraut í sex ár

„Þar fara vagnar fram hjá Landspítalanum og BSÍ. Það er mikill missir og við þurftum að finna einhverjar lausnir,“ segir Guðmundur. Hann segir að Hringbrautarverkefnið og Nýi-Landspítali hafi verið mjög skipulega gert og að Strætó hafi verið með í ráðum hvernig hægt væri að gera það þannig að sem minnst truflun yrði á kerfinu.

Leiðir 5 og 15 aka nýja leið til að komast frá Gömlu-Hringbraut á Snorrabraut en á leið austur munu leiðirn­ar beygja inn á Baróns­stíg og aka niður Bergþóru­götu og inn á Snorra­braut á leið sinni á Hlemm. Guðmundur segir að þröng beygja frá Barónsstíg inn á Bergþórugötu, til móts við Sundhöllina, hafi verið löguð að strætó.

Leið 15 mun keyra Barónsstíg og Bergþórugötu næstu sex árin. mbl.is/​Hari

„Það er búið að breyta götunum aðeins og búa til meira pláss þannig að það sé auðveldara fyrir strætó að taka beygjurnar,“ segir Guðmundur.

Leiðir 1, 3 og 6 munu keyra fram hjá BSÍ á gömlu Hringbraut og þaðan nýjan veg niður á Hringbraut. Sá vegur verður með aðgangsstýrðum ljósum fyrir strætó. „Það hefur verið talað um forgangsaðgerðir, eins og í tengslum við borgarlínu, og við höfum oft nefnt ljósastýringu. Það verður áhugavert að sjá hvernig það kemur út,“ segir Guðmundur.

• Blogga um frétt