10 brennur í Reykjavík 

Í Reykjavík verða 10 áramótabrennur um áramótin og verða brennurnar með svipuðu sniði og undanfarin ár. Stærstu brennurnar verða við Geirsnef, Gufunes og Fylkisbrennan við Rauðavatn.

Byrjað verður að hlaða í kestina miðvikudaginn 27. desember. Á vef Reykjavíkurborgar segir að best sé að fá hreint timbur á brennurnar. Stærstur hluti þess sem fer á brennurnar eru vörubretti en einnig er fenginn afgangur af jólatréssölunni. Plast, gúmmí og unnið timbur á ekki erindi í köstinn. 

Starfsmenn hverfastöðva Reykjavíkurborgar verða á vettvangi við flestar brennurnar og leiðbeina þeim sem koma með efni.  Hætt verður að taka á móti efni þegar þær eru orðnar hæfilega stórar eða í síðasta lagi kl. 12.00 á gamlársdag. 

Eldur verður borinn að köstunum kl. 20.30 á gamlárskvöld á öllum stöðum með tveimur undantekningum.  Á Úlfarsfelli er tendrað kl. 15.00 um daginn og í Skerjafirði er eldur borinn að kestinum kl. 21.00 eftir blysför sem hefst kl. 20.30. 

Brennurnar verða eftirfarandi:

1) Við Ægisíðu, lítil brenna.

2) Í Skerjafirði gegnt Skildinganesi 48 - 52,  (tendrað kl. 21.00, eftir blysför sem hefst kl. 20.30), lítil brenna.

3) Við Suðurhlíðar, neðan við Fossvogskirkjugarð, lítil brenna.

4) Laugardalur, fyrir neðan Laugarásveg 18, lítil brenna.

5) Geirsnef, á norðanverðu Geirsnefi, stór brenna.

6) Við Suðurfell, lítil brenna

7) Við Rauðavatn að norðanverðu, stór brenna.

8) Gufunes við Gufunesbæ, stór brenna.

9) Við Kléberg á Kjalarnesi, lítil brenna.

10) Úlfarsfell á athafnasvæði Fisfélagsins ofan við Lambhagaveg, (tendrað kl. 15.00), lítil brenna.

Hægt er að sjá nánari upplýsingar um brennurnar á vef Reykjavíkurborgar.

Kort af brennum í Reykjavík þessi áramót.

• Blogga um frétt