Gjaldtaka hafin í Vaðlaheiðargöngum

Gjaldtaka í Vaðlaheiðargöngum hófst í dag. Göngin voru opnuð fyrir umferð 21. desember og hafa ökumenn getað ekið gjaldfrjálst í gegnum göngin en þurfa hér eftir að greiða á bilinu 700 til 6.000 krónur fyrir ferðina, en verðið fer eftir gerð ökutækisins og greiðslumáta.

Frétt af mbl.is

90% umferðar um Vaðlaheiðargöng

Fullt veggjald fyrir fólksbíl er 1.500 krónur og 6.000 krónur fyrir flutningabíla og rútur. Hægt er að kaupa tíu, 40 eða 100 ferðir í einu og þannig lækkar gjaldið á fólksbíla niður í 1.250, 900 eða 700 krónur.

Hægt er að greiða fyrir ferðirnar á þrenns konar veg. Í fyrsta lagi með því að skrá bílnúmer og greiðslukort svo hægt sé að innheimta fyrir hverja ferð. Í öðru lagi með því að greiða fyrirframákveðið margar ferðir og í þriðjalagi með því að greiða innan þriggja klukkustunda eftir að hafa farið í gegnum göngin eða fá senda rukkun. Þá hækkar gjaldið hins vegar um þúsund krónur.

Nánari upplýsingar um gjaldtökuna má finna í myndskeiðinu hér að neðan og á sérstakri síðu um gjaldtöku í Vaðlaheiðargöngum.

• Blogga um frétt