„Stórkostlegt“ starf á Landspítalanum

Katrín Jakobsdóttir forsætisráðherra segir að stórkostlegt starf sé unnið á Landspítalanum og að það hafi veitt henni nýja sýn að kynnast starfsemi spítalans með eigin augum í heimsókn sinni þangað í morgun.

Frétt af mbl.is

Ráðherrar heimsóttu Landspítalann

„Það er allt annað að heimsækja Landspítalann sem sjúklingur eða aðstandandi sem ég hef auðvitað gert eins og flestir, eða að koma og fá að sjá á bak við tjöldin. Mér fannst það í sjálfu sér alveg stórmerkilegt að sjá hvað er gott starf unnið hér, ekki að ég hafi ekki vitað það, en það er öðruvísi að sjá það með eigin augum,“ sagði Katrín í samtali við mbl.is að lokinni heimsókninni.

Hún benti á að 5.900 starfsmenn vinni á Landspítalanum og um 1.800 nemar starfi þar á ársgrundvelli. Stofnunin sé mjög stór og því hafi verið merkilegt að kynnast utanumhaldinu um starfið þannig að allt gangi mestmegnis eins og smurð vél. „Það er eiginlega alveg stórkostlegt.“

„Góð og vel skipulögð heimsókn“

Heim­sókn­in var óvenju­leg fyr­ir þær sak­ir að þetta var í fyrsta sinn á þess­ari öld sem for­sæt­is­ráðherra Íslands heim­sæk­ir Land­spít­al­ann. Aðspurð sagðist Katrín hafa það á sinni dagskrá að heimsækja mikilvægir stofnanir á landinu. Hún hafi heimsótt Háskóla Íslands í vor og Landspítalinn hafi verið næstur á dagskrá. „Mér finnst það mikilvægt að fá að kynnast þessu innan frá sem forsætisráðherra og þetta var alveg gríðarlega góð og vel skipulögð heimsókn.“

Svandís Svavarsdóttir heilbrigðisráðherra var einnig með í för og nutu þær leiðsagnar Páls Matthíassonar, forstjóra Landspítalans. Fyrst heim­sóttu þær bráðamót­tök­una í Foss­vogi og fóru eft­ir það yfir á Land­spít­al­ann við Hring­braut. Auk þess að fræðast um starfsemina kynntu þær sér framkvæmdirnar sem standa þar yfir. 

Landspítalinn. mbl.is/Hjörtur

Skoðaði neyðarmóttöku fyrir þolendur kynferðisbrota

„Þetta er líka mikilvægt fyrir okkur og fyrir mig sérstaklega því ég er ekki inni í þessum málum dags daglega að sjá hvað er verið að gera vel, sem er gríðarlega margt, og líka hvaða áskoranir það eru sem spítalinn stendur frammi fyrir,“ sagði Katrín og fannst afar merkilegt að sjá fjarskiptamiðstöðina á bráðamóttökunni og neyðarmóttökuna fyrir þolendur kynferðisbrota. „Það er búið að vinna alvega gríðarlega gott starf á þessum tveimur stöðum og við stöndum á alþjóðavísu afar framarlega í því hvernig við erum að bregðast við. Eins fannst mér mjög merkilegt að sjá hjartadeildina, en ég er svo heppin að hafa ekki þurft að leita til hennar sjálf. En þetta er alveg virkilega gott og mikilvægt starf sem þarna er unnið.“

Ráðherrarnir fengu einnig að sitja „eins og fluga á vegg“ stöðufund þar sem farið var yfir verkefni dagsins og sagði Katrín þær hafa fengið mikla innsýn í starfsemina. Áskoranirnar séu miklar, ekki síst þegar kemur að mönnun og fráflæði, þ.e. útskrift sjúklinga af Landspítalanum.

mbl.is/Ómar Óskarsson

„Gömul saga og ný“

Embætti land­lækn­is barst í byrj­un des­em­ber ábend­ing um al­var­lega stöðu sem hafði skap­ast á bráðamót­töku Land­spít­al­ans og brást embættið við með því að hefja sam­dæg­urs hluta­út­tekt á stöðunni með heim­sókn­um, rýni á gögn­um og viðtöl­um við starfs­fólk og stjórn­end­ur.

Niðurstaða úttektarinnar var að bráðamót­töku spít­al­ans tak­ist vel að sinna bráðahlut­verki sínu. Vand­inn liggi í þjón­ustu við sjúk­linga sem bíða eft­ir inn­lögn og er meðald­val­ar­tími þeirra sem bíða inn­lagn­ing­ar á deild­ir spít­al­ans 23,3 klukku­stund­ir, sam­an­borið við 16,6 klukku­stund­ir í fyrra. Æskilegt viðmið er sex klukku­stund­ir.

Spurð út í næstu skref stjórnvalda vegna vandans sem steðjar að Landspítalanum sagði hún ljóst af skýrslunni að „það er mikill fjöldi rúma þar sem eru einstaklingar sem ættu kannski með réttu að vera á hjúkrunarheimili. Þetta er gömul saga og ný. Það er hluti af ástæðu þess að við settum átak í uppbyggingu hjúkrunarheimila sem eitt af okkar lykilmálum hjá stjórnvöldum. Við erum að fara að sjá töluverðar framkvæmdir þar á næstunni, þó að það sé auðvitað mikið verkefni,“ sagði Katrín og bætti við að vandinn snúist einnig um mönnunina. 

„Þar er heilbrigðisráðherra að vinna að áætlun um hvernig við getum gert betur í mönnun hjúkrunarfræðinga. Þetta er ekki séríslenskt mál. Þetta hef ég til dæmis rætt við mína kollega á Norðurlöndum þar sem þetta er vandi alls staðar,“ sagði hún.

Katrín Jakobsdóttir forsætisráðherra. mbl.is/Eggert

• 1 blogg um fréttina

Bloggað um fréttina

• Jóhannes Ragnarsson: Til er fólk sem lætur sig ekki henda að svelgjast …