Innlent | mbl | 13.1.2019 | 20:53 | Uppfært 14.1.2019 3:26

Ríkið selji Íslandsbanka

Bjarni Benediktsson, fjármála- og efnahagsráðherra, vill hefja söluferli á Íslandsbanka á þessu kjörtímabili. mbl.is/Kristinn Magnússon

Bjarni Benediktsson, fjármála- og efnahagsráðherra, segir að ríkið verði að draga sig út úr umfangsmiklu eignarhaldi sínu á bönkunum, selja Íslandsbanka og halda eftir 35-40% hlut í Landsbankanum. Þetta kom fram í viðtali við ráðherrann í kvöldfréttum RÚV.

Íslenska ríkið er eini eigandi Íslandsbanka og á rúmlega 98 prósenta hlut í Landsbankanum. Í hvítbók um fjármálakerfið sem var kynnt í desember voru stjórnvöld hvött til að huga að því að losa um eignarhluti í fjármálafyrirtækjum með heildstæðum hætti.

Frétt af mbl.is

Þurfi að hefja söluferli banka

Í könnun Gallup sem gerð var í október um traust til bankakerfisins kom hins vegar í ljós að mikill meirihluti almennings er jákvæður gagnvart eignarhaldi ríkisins á bönkunum. Þar kom einnig fram að fólk ber lítið traust til bankakerfisins og að algengustu orð sem almenningi dettur fyrst í hug til að lýsa bankakerfinu á Íslandi eru meðal annars græðgi, spilling, okur og hrun.

Frétt af mbl.is

Græðgi, spilling, okur og hrun

Bjarni sagði í samtali við fréttastofu RÚV í kvöld að hann vonist til þess að hægt verði að hefja söluferlið á þessu kjörtímabili. Þá vill hann að ríkið verði áfram aðaleigandinn að Landsbankanum, en hlutfallið verði lækkað töluvert, eða niður í 35 eða 45 prósent.

Söluferlið sé hins vegar skammt komið og segir Bjarni að það skipti máli að ferlið verði opið. „Við erum skammt á veg komin með það, næsta skref er að ræða um hvítbókina,“ sagði Bjarni.