Vegagerðin kynni hugmyndir um Hringbraut

Umferðaröryggi Hringbrautar í Reykjavík verður til umræðu á fundi umhverfis- og samgöngunefndar Alþingis í dag klukkan fjögur. Rósa Björk Brynjólfsdóttir, þingmaður VG, segir í samtali við mbl.is að hún hafi beðið um fundinn vegna bílslyss þar sem ekið var á barn fyrir nokkrum dögum.

Hún segist bera þær væntingar til fundarins að heyra hvaða hugmyndir Vegagerðin hefur um hvað sé hægt gera til þess að bæta umferðaröryggi, en Hringbraut fer í gegnum fjölmennasta hverfi Reykjavíkur og þurfa börn sem búsett eru báðum megin við götuna að sækja skóla sem er öðrum megin við hana.

Frétt af mbl.is

Vilja upplýsingar í tengslum við slys á Hringbraut

Bæði fulltrúar Vegagerðarinnar og Reykjavíkurborgar verða gestir nefndarinnar.

Spurð hvort hægt verði að fara í úrbætur á þessu ári í ljósi þess að búið er að samþykkja fjárlög fyrir árið, segir hún það vel geta gerst enda liggur ekki fyrir nákvæmlega hvaða aðgerðir þurfi að fara í og þær þurfi ekki endilega að hafa í för með sér mikinn kostnað, fyrst og fremst þurfi að kortleggja hvaða lausnir séu fyrir hendi.

Á níunda tímanum að morgni níunda janúar var ekið á barn á gatnamótum Meistaravalla og Hringbrautar og var það flutt á bráðamóttöku, þó var ekki talið að barnið hefði slasast alvarlega.

Sett var á gangbrautarvarsla í kjölfar slyssins sem sögð var tímabundin lausn. Reykjavíkurborg er ekki heimilt að ráðast í úrbætur án aðkomu Vegagerðarinnar þar sem vegurinn er í eigu þess síðarnefnda.

Frétt af mbl.is

Gangbrautarvarsla tímabundin lausn

• Blogga um frétt