Katrín Jakobsdóttir forsætisráðherra sagði húsnæðismál risastórt kjaramál í viðtali við Kastljós í kvöld, en átakshópur um framboð á íbúðum og aðrar aðgerðir til að bæta stöðu á húsnæðismarkaði kynnti í dag tillögur sínar í þeim efnum.
Verkalýðshreyfingin hefur kallað eftir aðkomu ríkisins að kjaraviðræðunum, m.a. úrbótum hvað húsnæðismál varðar, en þó einnig breytingum á skattkerfinu svo dæmi sé nefnt. Fram kom að fulltrúar verkalýðshreyfingarinnar hafi lagt til að fjöldi íbúa sem byggður verður á vegum íbúðafélagsins Bjargs verði tvöfaldaður, en félagið var stofnað af ASÍ og BSRB og nýtur verkefnið stofnframlaga frá ríkinu.
Katrín kvað aðspurð að ekki yrðu teknar ákvarðanir um slíkt í beinni útsendingu. „En nú liggur það fyrir og var rætt á samráðsfundi stjórnvalda með aðilum vinnumarkaðarins í dag. Við fórum yfir allar þessar tillögur og þær heyra undir mismunandi stofnanir og ráðuneyti, ríki, sveitarfélög og aðila vinnumarkaðarins.“
Katrín var spurð út í þann hóp fólks sem býr í ósamþykktu iðnaðarhúsnæði. Katrín segir að tillögur hópsins skili árangri fyrir þann hóp á næstu misserum.
Meðal áherslna verkalýðshreyfingarinnar er hópur bágborinna leigjenda í ljósi þess að hækkandi leiguverð hafi mikil áhrif á afkomu fólks.
„Við vitum það öll að húsnæðiskostnaður er risastórt kjaramál og það hefur auðvitað áhrif á ráðstöfunartekjur fólks í þessu landi ef húsnæðiskostnaður er mjög hár og íþyngjandi,“ sagði Katrín og vísaði til þess að bent hefði verið á að tekjulægsta fólkið verði æ hærra hlutfalli tekna sinna á óöruggum leigumarkaði. „Þetta er auðvitað risastórt lífskjaramál.“