Eðli höfundagreiðslna breytist

Fjármála- og efnahagsráðuneytið áformar að breyta skattalögum þannig, að höfundagreiðslur fyrir afnot af hugverki, sem viðurkennd rétthafasamtök innheimta, teljist til fjármagnstekna og verði skattlagðar þannig en ekki sem launatekjur.

Tilkynning um þessi áform hefur verið birt í samráðsgátt stjórnvalda. Er þar vísað til þess að í stefnuyfirlýsingu ríkisstjórnarinnar komi fram að hugað verði að breytingu á skattlagningu á tónlist, íslenskt ritmál og fjölmiðla.

Fyrsta skrefið snúi að bókum og síðan verði lagt til að hvers konar endurgjald til höfunda og rétthafa fyrir afnot af hugverki, að undanskildum höfundarlaunum, teljist til eignatekna/fjármagnstekna, að því er fram kemur í Morgunblaðinu í dag.