Innlent | mbl | 4.2.2019 | 11:22 | Uppfært 11:41

„Láttu hana vera, hún er bara 13 ára“

Jóns Baldvin Hannibalsson, fyrrverandi utanríkisráðherra. Bloggsíða hefur verið opnuð með frásögnum kvenna sem segjast hafa sætt kynferðisofbeldi og áreiti af hans hendi. mbl.is/RAX

Kona sem segist hafa verið starfskona í Ráðherrabústaðnum í utanríkisráðherratíð Jóns Baldvins Hannibalssonar er í hópi þeirra kvenna sem deilir frásögn af kynnum sínum af Jóni Baldvini á bloggsíðunni metoo-jonbaldvin.blog.is sem opnuð var í morgun.

Þetta var árið 1996 og hún var, ásamt unglingsstúlku, að vinna í eldhúsinu í Ráðherrabústaðnum við frágang eftir veislu sem átti að vera lokið.

„Ég heyrði læti og brothljóð og háværa rödd sem var verið að þagga niður í. Allt í einu þeysist Jón Baldvin Hannibalsson, þá utanríkisráðherra, inn og kallar: „Mig vantar kvenmann!!“ Hann grípur í mig aftan frá og tekur um brjóstin á mér. Mér brá svakalega og kallaði: „Farðu, karlandskoti.“

Við þetta hafi yfirmaður hennar komið inn og aðstoðað hana við að losna frá Jóni Baldvini, sem þá hafi ætlað að rjúka á unglingsstúlkuna. Yfirmaðurinn hafi hins vegar stöðvað hann með orðunum: „Láttu hana vera, hún er bara 13 ára.“

Er þetta var hafi Jón Baldvin verið búinn að brjóta húsgögn og borðbúnað sem aðrir sem gerst hefðu sekir um slíkt hefðu þurft að borga fyrir.

„Það var hringt á leigubíl og ég varð svo reið þegar unga stúlkan fór með. Jón neitaði að fara út í bílinn án hennar og fór yfirmaðurinn með hann heim. Ég hef aldrei getað hlustað á þennan mann í útvarpi né sjónvarpi. Hef oft hugsað hvað gerði hann við dætur sínar? Hann var eins og ófreskja. Þvílíkur ofbeldismaður,“ segir í frásögninni.

„En núna er þessi maður allur. Þökk sé hugrekki Guðrúnar og Aldísar mun hann aldrei aftur fá tækifæri til að áreita börn og konur. Og aldrei mun hann fá tækifæri á opinberum vettvangi. Í rauninni er hann útlægur héðan frá Íslandi. Ég samgleðst Aldísi og Guðrúnu að þessu erfiða verkefni sé að verða lokið og sérstaklega Aldísi sem hefur nú loksins hlotið uppreisn æru.“