Sammála um mikilvægi kennarastarfsins

Jan Tore Sanner, ráðherra menntamála og aðlögunar í Noregi, fundaði með Lilju Alfreðsdóttur, mennta- og menningarmálaráðherra, í gær. Sanner er staddur hér á landi í tengsl­um við fund sam­starfs­ráðherra Norður­landa sem fram fer í dag. Ráðherrarnir ræddu meðal annars áskoranir í menntamálum eins og stöðu barna af erlendum uppruna, áhrif tækni á skólastarf, stöðu drengja í skólakerfinu og skólasókn í framhaldsskólum. Ráðherrarnir voru sammála um mikilvægi kennarastarfsins og ræddu stöðu kennara í löndunum tveimur. Þetta kemur fram í fréttatilkynningu.

„Samband Íslands og Noregs byggir á sterkum grunni. Í fyrra heimsótti ég Noreg og kynnti mér hvernig Norðmenn hafa mætt ýmsum áskorunum sem við erum vinna með. Þeir hafa náð góðum árangri í að auka aðsókn í kennaranám þrátt fyrir lengingu námsins í fimm ár. Að sama skapi eiga þeir góðu gengi að fagna þegar kemur að iðn-, verk- og starfsnámi en hlutfall þeirra sem stunda slíkt nám er talsvert hærra í Noregi en hér á landi. Til þessa höfum við meðal annars horft við mótun menntastefnu fyrir Ísland til ársins 2030, við getum margt lært af Norðmönnum,“ segir Lilja Alfreðsdóttir, mennta- og menningarmálaráðherra, í fréttatilkynningu.

Ráðherrarnir ræddu einnig mikilvægi norrænnar samvinnu og samstarfs í menntamálum en það er vilji beggja að auka slíkt samstarf. Ísland fer með formennsku í norrænu ráðherranefndinni í ár en í formennskuáætlun Íslands er meðal annars sérstök áhersla lögð á ungt fólk og menntun. Meðal verkefna sem unnið er að á þeim vettvangi er verkefnið „Menntun fyrir alla“ sem miðar að því að Norðurlöndin verði í fararbroddi við innleiðingu á samnefndu heimsmarkmiði Sameinuðu þjóðanna. Verkefnið nær til allra skólastiga og lýtur að því að þjónusta og stuðningur við menntakerfi landanna verði í fremstu röð og að einstaklingar hafi tækifæri til fjölbreytts náms og starfa, án aðgreiningar. Aukinheldur verða á formennskuári Íslands haldnar ráðstefnur um málefni leikskóla á Norðurlöndum, gæði í háskólastarfi og stuðning við nýútskrifaða kennara, segir enn fremur í tilkynningu.

• Blogga um frétt