Mótmæla við Landsbankann

Hópur fólks er saman kominn fyrir utan húsnæði Landsbankans í Austurstræti til þess að mótmæla launum bankastjórans. Sjá má af skiltum fólksins að farið er fram á að laun Lilju Bjarkar Einarsdóttur verði lækkuð.

Mótmælendur eru margir hverjir íklæddir gulum vestum, líklega með tilvísun í mótmæli sem staðið hafa yfir mánuðum saman í Frakklandi, og eru merki Sósíalistaflokks Íslands sjáanleg á flestum þeirra.

Eins og sjá má á myndunum sem ljósmyndari mbl.is tók á staðnum eru Sanna Magdalena Mörtudóttir, borgarfulltrúi Sósíalistaflokksins, og Gunnar Smári Egilsson, formaður flokksins, meðal mótmælenda.

Laun bankastjóra Landsbankans voru hækkuð um 82% með tveimur launahækkunum á árunum 2017 og 2018 og hefur Lilja Björk 3,8 milljónir í mánaðarlaun.