Hlé gert í nótt á leitinni við Ölfusá

Hlé var gert á öðrum tímanum í nótt á leitinni að manni sem talinn er hafa ekið bíl sínum út í Ölfusá seint í gærkvöldi. Vakt var þó enn á nokkrum stöðum við ána að því er fram kemur á vef lögreglunnar.

Viðbragðsaðilar munu funda núna klukkan sjö til að ákveða framhaldið en til stendur að hefja leit aftur í birtingu svo framarlega sem veður leyfir.

Frétt af mbl.is

Telja sig vita hver var í bílnum

Tæplega 100 björgunarsveitarmenn tóku þátt í leitinni í gærkvöldi, auk áhafnar þyrlu Landhelgisgæslunnar, slökkviliðsmanna frá Brunavörnum Árnessýslu og sjúkraflutningum HSU ásamt lögreglumönnum.

Oddur Árnason, yfirlögregluþjónn á Selfossi, staðfesti í samtali við mbl.is í gærkvöldi að lögregla teldi sig hafa sterkan grun um hver ökumaður bílsins væri og var búið að hafa samband við aðstandendur hans sem höfðu fengið aðstoð frá áfallateymi Heilbrigðisstofnunar Suðurlands.

Frétt af mbl.is

Umfangsmikil leit við Ölfusá

• Blogga um frétt