Lokunin kemur ráðuneytinu á óvart

„Samningaviðræður standa yfir milli Sjúkratrygginga Íslands og SÁÁ um rekstur göngudeildarþjónustu á Akureyri. Fjárframlag af hálfu ríkisins til starfseminnar er tryggt í fjárlögum þessa árs. Það kemur því á óvart að SÁÁ ætli að loka göngudeildarþjónustunni tímabundið frá og með morgundeginum vegna kostnaðar.“

Þetta kemur fram í tilkynningu frá heilbrigðisráðuneytinu. Tilkynnt var í gær að SÁÁ þurfi að loka göngudeild sinni á Akureyri sökum fjárskorts.

Frétt af mbl.is

Reyna að koma í veg fyrir að fara á hausinn

Starfsemi SÁÁ var tryggð í fjárlögum í nóvember með 150 milljóna króna viðbótarfjármagni og var það í fyrsta sinn sem ríkið veitti sérstaka fjárveitingu til reksturs göngudeildarþjónustu.

Sjúkratryggingar Íslands annast gerð samninga um kaup á heilbrigðisþjónustu fyrir hönd ríkisins og í samræmi við það hefur stofnunin átt í viðræðum við SÁÁ um gerð þjónustusamnings vegna göngudeildarþjónustunnar á Akureyri.

SÁÁ og Sjúkratryggingar Íslands funduðu í byrjun vikunnar. Samkvæmt upplýsingum ráðuneytisins frá SÍ kom fram af hálfu fulltrúa SÁÁ að samtökunum væri vandi á höndum við að manna þjónustu göngudeildarinnar en það var ekki skilningur fulltrúa Sjúkratrygginga Íslands að SÁÁ vildu slíta samningaviðræðum eða loka starfseminni.

Þá vonar ráðuneytið að samningaviðræðum aðila verði haldið áfram og að ekki verði rof í þjónustunni á Akureyri meðan unnið er að gerð samnings um þjónustuna.

• Blogga um frétt