Reyni ekki að bjarga álftinni á eigin spýtur

Eitthvað hefur verið um að velviljaðir borgarar reyni upp á eigin spýtur að fanga álftina sem mbl.is greindi frá í gær að fest hef­ði gogg­inn í áldós. Íbúi í Urriðaholti sem fylgst hefur með álftinni biður fólk þó að gera slíkt ekki þar sem álftin fælist við slíkt og það geti spillt fyrir fyrirhuguðum björgunaraðgerðum.

Álftin, sem hefst við á Urriðakotsvatni, hefur verið með gogginn fastan í dósinni í a.m.k. tvær vikur og hafa íbú­ar í hverf­inu haft tals­verðar áhyggj­ur af að henni. Linda Hrönn Eggerts­dótt­ir, hjúkr­un­ar­fræðing­ur og íbúi í Urriðaholti, segir nokkurn skrið þó vera kominn á málið nú.

Frétt af mbl.is

Vilja hjálpa álft að losna við áldós

„Garðabær er kominn í málið,“ segir hún og kveður björgunaraðgerðir í undirbúningi. Að þeim munu koma starfsmenn áhaldahúss bæjarins og dýralæknir frá Matvælastofnun, auk þess sem fulltrúi frá Náttúrufræðistofnun tekur þátt í aðgerðunum.

„Það er fullt af fólki búið að bjóða sig fram til aðstoðar með gúmmíbáta og net. Þannig að það verða næstu skref,“ segir hún. Eitthvað hefur verið um að velviljaðir borgarar reyni að fanga álftina í háf, en Linda biður fólk um að gera slíkt ekki. Segir hún álftina hafa fælst við slíkt og hafi nú hrakist frá stað sem gott hefði verið að fanga hana á og lengra út á vatnið.

• Blogga um frétt