„Við erum búin að læra það í dag, að þrátt fyrir að við séum hópur af reynslulausu fólki þegar kemur að verkföllum, þá getum við sannarlega látið hlutina gerast,“ segir Sólveig Anna Jónsdóttir, formaður Eflingar stéttarfélags.

Hún segist vera þreytt eftir daginn en hæstánægð með samstöðuna. „Magnaður dagur,“ segir hún, nýkomin inn í Gamla bíó aftur, eftir að verkfallskonur gengu aðra kröfugöngu dagsins nú síðdegis.

Kröfugangan var á milli helstu hótela í bænum, þar sem verkfallsverðir Eflingar stóðu einnig vörð. „Við vorum sýnilegar og við vorum sjáanlegar. Þessi dagur er búinn að vera brjálæðislega valdeflandi,“ segir Sólveig.

Fleiri hundruðir félagskvenna komu saman fyrr í dag til að sýna samstöðu en um leið sækja sér verkfallsgreiðslur. Nú síðdegis var haldin önnur kröfuganga um borgina.

Hvort verkföll séu það sem koma skal, skal Sólveig ekki segja. „Við erum að minnsta kosti tilbúin í meira ef atkvæðagreiðslurnar sýna niðurstöðu á þá leið,“ segir hún. Hún segir þetta allt velta á því, hvort atvinnurekendur séu tilbúnir að mæta kröfum þeirra.

Samstöðufundi í Gamla bíó lýkur klukkan sex og verkfallinu á miðnætti í kvöld.