„Vonum að fólk fylgist vel með veðri“

„Við vonum að fólk fylgist vel með veðri og fari kannski í fyrra fallinu heim úr vinnu því umferðin verður þyngri. Ef fólk er á ferðinni mikið eftir fjögur þá gæti ferðin heim úr vinnu orðið lengri en venjulega,“ segir Sigurjón Hendriksson, varðstjóri slökkviliðsins. Von er á krappri lægð yfir landið og færð gæti spillst víða um land þar með talið á höfuðborgarsvæðinu.

Veðurstofan hefur gefið út appelsínugula og gula viðvörun fyrir landið.

Frétt af mbl.is

Kröpp lægð gengur yfir landið

„Við erum aðeins búin að undirbúa okkur. Ef ferðin daprast mikið þá hægist á öllu hjá okkur. Við erum búin að bæta við tveimur bílum því við reiknum með að flutningar taki lengri tíma eftir klukkan fjögur,“ segir Sigurjón.

Á föstudögum er alla jafna mikill erill í sjúkraflutningum og eru þeir á bilinu 70 til 80 talsins. Upp úr hádeginu voru þeir orðnir um 50 talsins. 

Hellisheiði gæti lokast um kl. 16

Nokkrar líkur eru á að vegurinn yfir Hellisheiði geti lokað tímabundið eftir kl. 16 í dag. Hugsanlega getur vegurinn um Þrengsli einnig lokað á svipuðum tíma. 

Éljabakki gengur yfir suðvestanvert landið síðdegis með snjó um tíma og það hvessir og skefur vestan við hann. Undir kvöld á milli kl. 17 til 19 er spáð 15-20 m/s og verður blint sem sagt austur yfir fjall. Frá kl. 16 til 22 má reikna með sviptivindum frá Öræfum austur á Hérað, 40-50 m/s í hviðum. Þetta kemur fram á vef Vegagerðarinnar. 

Sigurjón bendir á að það er enn óvíst hvar lægðin lendir og því gott að fylgjast vel með. Höfuðborgarsvæðið gæti sloppið að hluta.  

• Blogga um frétt