Vonar að menn séu reiðubúnir að semja
Setja bókamerki
Þorsteinn Már Baldvinsson, forstjóri Samherja, er ekki sáttur við skýringar Más Guðmundssonar seðlabankastjóra í tengslum við Samherjamálið svo nefnda. Hann segir líka skiljanlegt að mönnum geti orðið heitt í hamsi eftir að hlýða á Má, en uppákoma varð þegar Baldvin Þorsteinsson, sonur hans, sagði seðlabankastjóra að „drulla sér í burtu“. Ólíkt Má kunni þeir feðgar þó að biðjast afsökunar.
„Það er kannski munurinn á mér og syni mínum og svo Má að ef við göngum of langt að þá biðjumst við afsökunar. Það gerir Már Guðmundsson aldrei,“ segir Þorsteinn Már í samtali við mbl.is.
Seðlabankastjóri kom í morgun á fund stjórnskipunar- og eftirlitsnefndar Alþingis, þar sem fjallað var um lög um gjaldeyrismál og stjórnsýslu Seðlabanka Íslands við framkvæmd gjaldeyriseftirlits, og voru Þorsteinn Már og sonur hans meðal áheyrenda á fundinum. Að fundi loknum hugðist seðlabankastjóri, taka í höndina á Þorsteini Má, en sonurinn gekk á milli. „Hafðu smá sómakennd og drullaðu þér í burtu,“ sagði Baldvin við Má.
Kolbeinn Óttarsson Proppé, þingmaður Vinstri grænna, gekk þá á milli.„Ég geri ráð fyrir að ef mönnum fannst Baldvin ganga of langt, þá er ég viss um að hann mun biðjast afsökunar á því. Ég átti ekki neitt vantalað við Má. Það var hann sem reyndi að nálgast mig og þetta voru viðbrögð Baldvins,“ segir Þorsteinn Már, sem var ekki sáttur við útskýringar seðlabankastjóra á fundi nefndarinnar.
Klippir og límir eins og honum passar
„Eins og svo oft áður þá eru þær [fullyrðingarnar] rangar. Hann bara klippir og límir eins og maður segir og tekur það sem passar honum,“ segir Þorsteinn Már. Nefnir hann sem dæmi að Seðlabankastjóri hafi nefnt að hann hafi fengið lögfræðiálit árið 2012 á heimild til að sekta einstaklinga og fyrirtæki, en látið hjá líða að fram hafi komið í áliti lögmannsins sem vann það að ósennilegt væri að Seðlabankinn myndi vinna slík mál fyrir dómstólum. Þá sé álit ríkissaksóknara frá 2014 mjög skýrt og ekkert nýtt komi fram í áliti ríkissaksóknara sem seðlabankastjóri beini nú athyglinni að. „Það álit segir einfaldlega að lesa eigi álitið frá 2014,“ segir Þorsteinn Már.
Sama gildi um dóm Hæstaréttar frá 2018. „Hann er bara sex orð og segir að niðurstaða héraðsdóms sé staðfest. Þann dóm hafi Már sagt vera umdeildan og ekki rökstuddan þótt Seðlabankinn hafi ekki leitað utanaðkomandi álits á því hvort áfrýja bæri málinu til Hæstaréttar. „Þau tóku þá ákvörðun innandyra og það sýnir bara þetta ferli. Það er alltaf haldið áfram,“ segir hann. „Þau vita að sjálfsögðu að það er bæði verið að skaða fólk og verið að gera tilraunir, sem þeim finnst alveg sjálfsagt að gera — að fara áfram með mál til að athuga hvað dómstólar gera. Þetta snýst um fólk og það hefur verið þungbært fyrir marga að sitja undir þessum ásökunum.“
Fjallar að sjálfsögðu um Samherjamálið
Þorsteinn Már segist því ekki sammála Má, sem sagði á fundinum í dag skilaboð um heimildir hafa verið misvísandi. „Þær hafa verið skýrar allan tímann,“ segir hann og kveður þau orð Rannveigar Júníusdóttur, framkvæmdastjóra gjaldeyriseftirlits Seðlabankans, að álit umboðsmanns Alþingis fjalli ekki um Samherjamálið vera dæmigert fyrir hvernig verið sé að reyna að villa um fyrir mönnum „Að sjálfsögðu fjallar það um Samherjamálið,“ segir hann.
Spurður hvort hann telji málinu lokið segir Þorsteinn Már ljóst að formaður bankaráðs Seðlabankans telji því ekki lokið, þó að seðlabankastjóri virðist á öðru máli. „Már segir málinu lokið núna. Hann er búinn að vera að tjá sig um það árum saman og svo núna ætlar hann allt í einu ekki að tjá sig,“ segir hann og kveður Má hafa brotið alla hefðbundna stjórnsýslu til að mynda með því að gefa alltaf sekt til kynna.
„Núna segir hann allt í einu málinu lokið og ætlar ekki að biðjast afsökunar,“ segir Þorsteinn Már. Orð Gylfa Magnússonar, formanns bankaráðs Seðlabankans, bendi hins vegar til að bankaráð sé á annarri skoðun. „Hann vill að bankaráð hafi forgöngu um að reyna að ljúka þessu máli og það er von mín að það sé líka vilji forsætisráðherra,“ segir hann.
Kæra ef málinu verður ekki lokið
Sjálfur kveðst Þorsteinn Már vonast til að málinu fari að ljúka. „Ef það verður hins vegar ekki gert af hálfu bankaráðs og það tafið með lögfræðiálitsgerðum sem Már mun reyna að láta taka langan tíma þá er ljóst að við förum áfram með málið.“ Segir hann Samherja þá munu leita réttar síns. „Þá munum við jafnframt kæra einstaklingana sem stóðu fyrir ólöglegri húsleit og hafa verið að bera rangar sakargiftir, hvort sem er á mig eða aðra. Hafa ber í huga að það er gert með það í huga að koma mér og fleirum í fangelsi,“ segir Þorsteinn Már og kveðst þar vísa til þeirra Más, Rannveigar og Sigríðar Logadóttur, aðallögfræðings Seðlabankans.
Umfang tjónsins, sem sé þrískipt, verði hins vegar aldrei fullbætt. Þar sé um að ræða það tjón sem búið sé að valda þeim einstaklingum sem hafa verið ásakaðir á rangan hátt bæði beint og óbeint. „Það tjón verður aldrei bætt,“ segir hann. „Viðskiptavild verður heldur aldrei bætt, né heldur þau tækifæri sem fyrirtækið missti af vegna þess að þetta var gert með það fyrir augum að skaða sem mest og það tókst,“ segir Þorsteinn Már og minnir á að húsleitin hafi verið gerði í beinni útsendingu og fréttatilkynningar í kjölfarið sendar út um allan heim.
„Síðan er það annað fjárhagslegt tjón og það er útlagður kostnaður.“ Vísar Þorsteinn Már þar til lögfræðikostnaðar Samherja vegna málsins. Fram hafi komið í máli Gylfa að bankinn hafi eytt í gífurlegum fjármunum í Samherjamálið og athygli veki að Seðlabankinn sé eina stofnunin innan stjórnkerfisins sem komist upp með að gefa ekki kostnaðartölurnar. „Ég get þó trúað að þær verði birtar einhvern tímann þegar Már er farinn úr húsi,“ segir hann og kveðst nú horfa bara til þess að menn séu reiðubúnir að setjast niður og reyna að semja.
Vegirnir voru eins og borðstofuborð
„Við höldum áfram þangað til við erum búin“
Vika í kosningar: Þetta segja kannanir
Reiðubúin að aflýsa verkföllum í fjórum leikskólum
Hulda saksóknari: „Tökum þetta ekki til greina“
Gasmengun gæti borist yfir höfuðborgarsvæðið
Viðræður ekkert þokast frá því á þriðjudag