London, París, Róm. GAY, LUV, MOM og DAD. Vélar flugfélagsins WOW air, með sínum sniðugu nöfnum og hressu áhöfnum, hafa flutt Íslendinga og aðra ferðalanga vítt og breitt frá árinu 2012.

„WOW er náttúrlega bara WOW, og við höfum sagt að okkur finnist Ísland einfaldlega WOW. Svo er ekki verra að ef vörumerkinu er snúið við þá er þetta MOM [ísl. móðir] og það vilja allir vera í fanginu á móður sinni. Þannig að þetta fór ágætlega saman,“ sagði Skúli Mogensen, þá stjórnarformaður og aðaleigandi WOW Air, er opnað var fyrir bókanir með flugfélaginu í fyrsta sinn í lok nóvember árið 2011. Við það tilefni fékk hann Jónu Lovísu Jónsdóttur, vaxtarræktarkonu og prest, til að opna vefsvæði flugfélagsins og blessa starfsemina. Þannig hófst WOW-ævintýrið í fjölmiðlum og var þessari líflegu ímynd félagsins, þar sem farið var ótroðnar slóðir í markaðssetningu, komið rækilega til skila í starfseminni næstu árin. 

Í fyrstu voru tólf áfangastaðir í Evrópu í boði en svo var flogið vængjum þöndum til Norður-Ameríku og að síðustu var stefnan tekin á Asíu. 

En nú er ævintýrið, sem WOW auglýsti svo oft, úti. „Við mun­um alltaf vera WOW og ég mun aldrei gleyma ykk­ur,“ skrifaði Skúli í bréfi til starfsmanna í morgun. „Ég vona og treysti því að þið munið aldrei gleyma WOW-and­an­um og að þið takið hann með ykk­ur í ykk­ar næsta æv­in­týri.“

Í söfnum mbl.is og Morgunblaðsins eru tugir mynda frá ýmsum atburðum tengdum starfsemi WOW. Flestar eru líklega af hinni fjörlegu reiðhjólakeppni, WOW Cyclothon, og af hátíðarhöldum í tengslum við nýja áfangastaði. Yfirleitt er gleðilega yfirbragðið allsráðandi, það sem frá upphafi einkenndi markaðssetningu WOW.