200 mílur | Morgunblaðið | 13.4.2019 | 9:30 | Uppfært 9:58

Ný þurrkunarverksmiðja Lýsis opnuð í Þorlákshöfn

Fjölmennt var við opnun nýju verksmiðjunnar í gær. Gunnlaugur Sævar Gunnlaugsson, stjórnarformaður Lýsis hf., ávarpaði starfsmenn fyrirtækisins og þá gesti sem saman voru komnir. mbl.is/Árni Sæberg

Þó úti blési mikill vindur þá væsti ekki um fólk inni í nýrri hausaþurrkunarverksmiðju Lýsis, sem opnuð var í grennd við Þorlákshöfn síðdegis í gær.

Katrín Pétursdóttir, forstjóri Lýsis, segir í samtali við Morgunblaðið að nýja verksmiðjan leysi þá gömlu af hólmi, sem staðsett hefur verið innanbæjar í Þorlákshöfn.

„Það var orðið tímabært að endurnýja húsakostinn og um leið bæta staðsetninguna,“ segir Katrín. Bendir hún á að nýja verksmiðjan, nokkra kílómetra vestan við byggðina, eigi að geta verið í meiri sátt við samfélagið sökum fjarlægðar frá lyktinni sem af starfseminni stafar. Enn fremur sé hún til marks um grunnhugsun Lýsis hf., þ.e. fullnýtingu afurða og virðingu fyrir náttúrunni.

Húsið er 2.500 fermetrar að stærð og með því mun afkastagetan geta aukist um 40 til 50 prósent. „Gott flæði er í húsinu og þurrkunin verður bæði betri og fljótlegri. Það var margt sem við gátum bætt með því að hanna hús utan um starfsemina frá grunni,“ segir Katrín í umfjöllun um mál þetta í Morgunblaðinu í dag.