Innlent | mbl | 8.5.2019 | 17:37 | Uppfært 9.5.2019 5:29

Horft verði til snemmtækra inngripa

Ingibjörg Briem félagsráðgjafi, Ásmundur Einar Daðason, félags- og barnamálaráðherra, og Linda Hrönn Þórisdóttir, formaður faghópsins. Ljósmynd/Félagsmálaráðuneytið

Skýrsla faghóps um samfélagslega virkni fyrir einstaklinga með geðrænan vanda var í dag afhent Ásmundi Einari Daðasyni, félags- og barnamálaráðherra, en hópurinn var skipaður í september 2018 til þess að skilgreina hvers konar þjónustu, fjármagnaða af hinu opinbera, þeir þyrftu á sviði félagsþjónustu og vinnumarkaðsaðgerða.

„Tillögur hópsins lúta að því að horft verði til snemmtækra inngripa og tryggt að þjónustan sé samþætt til að einstaklingar falli ekki á milli þjónustukerfa. Faghópurinn leggur áherslu á að einstaklingar með geðræn vandamál séu ólíkir innbyrðis og því þýðingarmikið að þjónustan sem boðið er upp á sé fjölbreytt og miðuð að þörfum hvers og eins. Eins leggur hann áherslu á þverfaglega nálgun sem stuðlar að nánu samstarfi heilbrigðis- og félagsþjónustu sem og vinnumála- og skólakerfis,“ segir í fréttatilkynningu.

Enn fremur segir að á síðustu áratugum hafi komið fram mörg virkniúrræði á Íslandi fyrir einstaklinga með geðrænan vanda, en virkni sé lykilþáttur í að ná aftur og viðhalda bata. Í flestum tilvikum hafi þau verið á vegum grasrótar- og félagasamtaka en að einhverju eða mestu leyti fjármögnuð af hinu opinbera.

Leggur til heildstæða ráðgjafarmiðstöð

„Tilgangur virkniúrræða ætti að vera að veita einstaklingum hlutverk, rjúfa einangrun og aðstoða við að koma á og viðhalda rútínu. Að mati hópsins er mikilvægt að slík starfsemi sé notendastýrð og ekki háð tilvísunum fagaðila. Faghópurinn er sammála um að glufur séu í kerfinu þegar kemur að aðstoð, utanumhaldi og eftirfylgni við þá einstaklinga sem eru með geðrænan vanda. Þá er hópurinn sammála um mikilvægi skýrra verkferla þegar um málefni þessara einstaklinga er að ræða svo unnt sé að tryggja að hver og einn sé metinn að verðleikum í samræmi við getu, áhuga, reynslu og/eða menntun.“

Faghópurinn leggi enn fremur til heildstæða ráðgjafarmiðstöð í anda „headspace“ til þess að koma til móts við þarfir ungs fólks, en aukið nýgengi örorku sé áhyggjuefni þeirra á meðal. „Mikilvægt er að ná til ungs fólks og erlendis hafa slíkar ráðgjafamiðstöðvar, þar sem lykilatriði er opinn aðgangur án tilvísunar, gagnast því vel. Þá telur faghópurinn mikilvægt að atvinnuþátttaka fólks með geðraskanir fái meiri stuðning og bendir sérstaklega á IPS-hugmyndafræði (e. Individual Placement and Support) í því samhengi en hún byggist á getu og áhuga einstaklings til virkni/vinnu fremur en takmörkunum.“