Mikið dró í fyrra úr þeirri miklu fjölgun ferðamanna sem varð hér á landi eftir 2010. Þetta var meðal þess sem kom fram á hádegiskynningu Ferðamálastofu í dag, en þar voru kynntar nýjar niðurstöður um fjölda og dreifingu ferðamanna 2018, sem byggð er á talningum á yfir 30 áfangastöðum um allt land.

Verkefnið var unnið fyrir Ferðamálastofu af þeim Rögnvaldi Ólafssyni og Gyðu Þórhallsdóttur og byggir á aðferðafræði sem þau hafa þróað með því að telja bifreiðar sem koma á áfangastaðinn.

Talning þeirra sýnir að Suðurland er vinsælt meðal ferðamanna allt árið um kring, en árstíðasveifla er mun meiri annars staðar á landinu. Þá virðast Snæfellsnes og Borgarfjörður vera að sækja á sem viðkomustaðir ferðamanna en þar bæði fjölgar ferðamönnum og árstíðarsveiflan minnkar.

Margir ferðamannastaðir á Norður-og Vesturlandi eru hins vegar vannýttir utan háannatíma, en talningar eru ein leið til að meta hvert ferðamenn fara og hve margir ferðamenn eru á helstu áfangastöðum og út frá þeim má sjá hvernig ferðamenn dreifast um landið.

Höfundar könnunarinnar eru þeirrar skoðunar að hægt mjakist til betri vegar og að hægt sé að draga meira úr árstíðasveiflunni, en niðurstaða verkefnisins verður kynnt nánar í skýrslu sem kemur út á næstu vikum og verða gögnin þá gerð aðgengileg í Mælaborði ferðaþjónustunnar.

Tengdar fréttir

Ferðafélag Íslands

5 skemmtilegar fjallgöngur í nágrenni Reykjavíkur

• Mikilvægt að almenningur eigi rétt á frjálsri för
• Allir út að hreyfa sig
• Tólf góðar gönguleiðir
• John Snorri og Lína Móey sigruðu hæstu tinda heims

» Fleiri tengdar fréttir

• Blogga um frétt