Munu framvegis kveðja á annan hátt

Útskriftarnemendur við Menntaskólann á Akureyri munu halda áfram að kveðja skólann sinn í lok skólagöngu, en það verður framvegis með öðrum hætti eftir alvarlegt slys sem átti sér stað í svokallaðri dimmiteringu útskriftarnema í gær.

Hefð hefur verið í skólanum að útskriftarnemar ferðist um bæinn á skreyttum vögnum aftan í dráttarvélum, nokkuð sem tíðkast hefur víða um land. Samkvæmt upplýsingum frá lögreglu klemmdist stúlka þegar vökvaknúinni loku á malarflutningavagni var lokað þegar vagninn var kyrrstæður. Lögreglan á Norðurlandi eystra hefur gefið út að óheimilt verði að nota slíka vagna í þessum tilgangi í kjölfar slyssins.

„Nú þarf að halda utan um þá sem eru í áfalli eftir þetta hörmulega slys,“ segir Jón Már Héðinsson, skólameistari Menntaskólans á Akureyri, í samtali við mbl.is. Samkvæmt því sem RÚV hefur eftir lögreglu var stúlkan flutt til Reykjavíkur með sjúkraflugi með alvarlega áverka á andliti, en þó ekki sögð í lífshættu.

Jón Már segir nemendur og starfsfólk skólans slegið, standi þétt saman og þakki fyrir að stúlkan sé ekki sögð í lífshættu.

„Þetta var mjög alvarlegt slys. En eins og gerist í áföllum þá þjappast fólk saman líka. Við fengum áfallateymi Rauða krossins til þess að koma og erum með skólasálfræðing sem heldur betur sannar mikilvægi sitt á svona erfiðum tímum. Starfsfólk skólans hefur staðið sig vel í þessu, ásamt foreldrum og öllum sem að þessu hafa komið,“ segir Jón Már Héðinsson, skólameistari Menntaskólans á Akureyri.

Frétt af mbl.is

Slasaðist við dimmiteringu á Akureyri

• 1 blogg um fréttina

Bloggað um fréttina

• Ómar Ragnarsson: Gangaslagurinn úr sögunni í M.R. Vagnarnir líka á leiðinni út?