Fjórir ráðherrar með 169 nefndir og ráð

Fjórir af ellefu ráðherrum í ríkisstjórn Íslands hafa svarað fyrirspurn Ingu Sæland, formanns Flokks fólksins, um hve margar nefndir, ráð, starfshópar og faghópar störfuðu á vegum hvers ráðuneytis og hver kostnaður hafi verið af þeim á síðasta ári.

Samtals eru forsætisráðherra, sveitarstjórnar- og samgönguráðherra, félags- og barnamálaráðherra og heilbrigðisráðherra með 169 nefndir á sínum snærum. Samanlagður kostnaður við nefndir þessara fjögurra ráðherra á liðnu ári nam um 450 milljónum króna.

Enn eiga sjö ráðherrar eftir að svara fyrirspurninni og heildarkostnaður er því mun hærri, að því er fram kemur í fréttaskýringu um þetta mál í Morgunblaðinu í dag.