Nýbyggingin kynnt þingmönnum

„Við ákváðum að gera eitthvað sameiginlega og það mæltist mjög vel fyrir,“ segir Steingrímur J. Sigfússon, forseti Alþingis, um Alþingisdaginn sem haldinn var sl. föstudag.

Þar var fundað með bæði þingmönnum og starfsfólki þingsins og farið yfir ýmis mál sem snerta þingið sem sameiginlegan vinnustað.

Þetta mun vera í fyrsta sinn sem dagur af þessu tagi er haldinn í þinginu þar sem bæði þingmenn og starfsmenn koma saman, utan jólahlaðborða, og segir Steingrímur að það sé ekki ólíklegt að dagurinn verði haldinn aftur. „Bæði þingmenn og starfsmenn sem ég heyrði í voru mjög ánægðir, og þetta undirstrikar það að við erum einn vinnustaður og eitt samfélag. Við vinnum í miklu návígi og erum hvert öðru háð í þeim skilningi að starfsemi Alþingis væri ekki beysin nema fyrir okkar starfsfólk,“ segir Steingrímur í umfjöllun um þetta mál í Morgunblaðinu í dag.