Innlent | mbl | 23.5.2019 | 22:48 | Uppfært 24.5.2019 1:31

Færri amerískar vörur vegna EES

mbl.is/Kristinn Magnússon

Meðal ástæðna þess að ekki hefur verið boðið upp á meira úrval af amerískum vörum í Costco á Íslandi en raun ber vitni eru evrópskar reglur sem gilda hér á landi vegna aðildar landsins að samningnum um Evrópska efnahagssvæðið (EES).

Frétt af mbl.is

Fólk vill meira af amerískum vörum

Þetta kom meðal annars fram í máli talsmanna Costco á Íslandi fyrir og eftir að verslunin í Kauptúni í Garðabæ var opnuð fyrir réttum tveimur árum. Engilbert Arnar Friðþjófsson, sem hélt úti vinsælli facebooksíðu um Costco, sagði meðal annars í samtali við mbl.is í dag í tilefni af tveggja ára afmæli Costco á Íslandi að það sem fólk á Íslandi vildi helst væru fleiri amerískar vörur miðað við facebooksíðuna hans.

Þær reglur sem um er að ræða snúa einkum að matvælamerkingum en reglur Evrópusambandsins, sem teknar eru upp hér á landi í gegnum EES-samninginn, eru gjarnan ólíkar þeim reglum sem gilda vestan hafs sem aftur getur kallað á umtalsverðan kostnað við endurmerkingar í samræmi við evrópsku reglurnar.

Frétt af mbl.is

Hagkvæmara að flytja inn frá Evrópu

Önnur ástæða er lægri flutningskostnaður frá Evrópu til Íslands en frá Ameríku, en upphaflega stóð til að verslunin á Íslandi yrði útibú frá Costco í Kanada og að mun meira af amerískum vörum yrði á boðstólum í henni, ekki síst kanadískum. Niðurstaðan varð sú að Costco á Íslandi yrði útibú frá starfsemi fyrirtækisins í Bretlandi.

Fyrir vikið er Costco-verslunin í Kauptúni líkari þeim verslunum sem eru í Bretlandi en Bandaríkjunum eða Kanada að sögn forsvarsmanna fyrirtækisins og mikið af þeim vörum sem boðið er upp á eru ennfremur breskar eða frá öðrum Evrópuríkjum.