Vilja innlegg íbúa við gerð nýs leiðanets

Vinna er hafin við nýtt leiðanet Strætó sem er skipulagt með það að markmiði að tengja vagna Strætó við fyrsta áfanga Borgarlínu. Þá kalla skipulagsbreytingar á Hlemmi og umferðarmiðstöð BSÍ einnig á breytingu á núverandi leiðakerfi.

Þetta kemur fram í tilkynningu frá Strætó. Þar segir að faghópur um almenningssamgöngur hafi verið skipaður í byrjun febrúar og áætlað sé að hann skili tillögu að nýju leiðaneti til stjórnar Strætó í nóvember.

Mikil áhersla er lögð á samráð við íbúa höfuðborgarsvæðisins og hefur stutt könnun því verið gerð aðgengileg á vef Strætó. Sem flestir íbúar eru hvattir til þess að gefa sér nokkrar mínútur til að svara könnuninni.

Sæti í faghóp um almenningssamgöngur eiga fulltrúar úr leiðakerfi Strætó, fulltrúar sveitarfélaganna á höfuðborgarsvæðinu, fulltrúi Vegagerðarinnar, fulltrúi Samtaka um bíllausan lífstíl og fulltrúi samgöngu- og sveitarstjórnarráðuneytisins.

• Blogga um frétt