Riðin árleg tvídreið

Þau voru gleðileg að sjá, fólkið sem klæddi sig í sitt fínasta púss upp úr hádegi í dag og kom saman við Hallgrímskirkju til þess að hjóla uppstrílað um miðbæ Reykjavíkur. Það var í hinni árlegu tvídreið, sem er kölluð Tweed Ride Reykjavík.

Eins og nafnið ber með sér skyldu menn klæddir í föt úr tvídi, sem er þykkt ullarefni og þykir fágaður klæðnaður.

Lagt var af stað klukkan 14.45 frá Hallgrímskirkju og tekinn rúntur um bæinn. Endastöðin er Ægisgarður, þar sem verðlaun verða veitt best klædda herramanninum, best klæddu dömunni og þeim, sem þótti hjóla á fallegasta hjólinu.

Reiðin hefur verið riðin hérlendis síðan 2012. Ljósmyndari mbl.is mætti á staðinn að þessu sinni og fangaði stemninguna við Hallgrímskirkju.