Innlent | mbl | 28.5.2019 | 18:07 | Uppfært 29.5.2019 6:17

Leiðtogi sent tugi milljóna úr landi

mbl.is/Eggert

Margir þeirra skipulögðu glæpahópa sem hafa náð fótfestu á Íslandi koma frá Austur-Evrópu, ríkjum á borð við Pólland, Litháen, Rúmeníu og Albaníu. Greiningardeild ríkislögreglustjóra er kunnugt um þrjá hópa manna sem allir koma frá einu ríki í Austur-Evrópu.

Frétt af mbl.is

Aukin áhætta vegna skipulagðra glæpa

Hóparnir halda uppi skipulagðri brotastarfsemi á Íslandi sem í senn er víðfeðm og ábatasöm, að því er segir í kafla um skipulagða misnotkun erlendra afbrotahópa á opinberri þjónustu og kerfum í nýrri skýrslu greiningardeildar ríkislögreglustjóra. Þar kemur fram kemur að fjöldi, umsvif og stærð skipulagðra glæpahópa á Íslandi fari vaxandi.

Lögregla telur að allt að 50 manns kunni að tengjast þessari starfsemi en ekki er þó ekki fullyrt að allir séu þeir ábyrgir gerendur. Hugsanlegt er að einhverjir þeirra sæti nauðung, jafnvel vinnumansali og séu neyddir til að láta afrakstur afbrota og/eða „svartrar vinnu“ af hendi til leiðtoga hópsins og jafnvel fleiri einstaklinga.

Fengið alþjóðlega vernd á grundvelli kynhneigðar

Rannsóknir lögreglu leiða í ljós að einstaklingum sem tengjast þessum þremur hópum hefur verið veitt alþjóðleg vernd á Íslandi m.a. á grundvelli kynhneigðar. Nokkrir þessara karlmanna frá íslömsku ríki hafa verið kærðir fyrir kynferðislega áreitni gagnvart konum hér á landi. Hóparnir hafa án teljandi vandkvæða aflað sér kennitalna á Íslandi og í kjölfar þess opnað bankareikninga og jafnvel stofnað fyrirtæki. Kennitölur og bankareikningar eru grunnþættir í peningaþvætti og tilfærslum á fjármunum sem aflað hefur verið með skipulagðri brotastarfsemi, samkvæmt skýrslunni.

Mál sem lögregla hefur haft til rannsóknar sýna að nokkrir meðlimir þessara hópa hafi nýtt sömu kennitölu og þannig m.a. getað leynt veru sinni í landinu en stundað „svarta vinnu“ á sama tíma.

Frétt af mbl.is

Vaxandi kókaínneysla á Íslandi

Leiðtogi sem þiggur félagslega aðstoð

Leiðtogi eins hópsins hefur á síðustu misserum sent tugi milljóna króna úr landi. Sami maður hefur þegið félagslega aðstoð af margvíslegu tagi, þ. á m. fjárhagsaðstoð á sama tíma.

Fyrirliggjandi upplýsingar eru á þann veg að innan hópa þessara sé að finna réttnefnda „kerfisfræðinga“; einstaklinga sem búa yfir yfirgripsmikilli þekkingu á kerfum opinberrar þjónustu og félagsaðstoðar hér á landi. Hátt flækjustig innan opinberra kerfa á Íslandi nýta þessir menn til fullnustu, meðal annars með notkun á fölsuðum skilríkjum og fjölda tilbúinna nafna. Fyrir vikið getur það kostað mikla vinnu að afla grundvallarupplýsinga um viðkomandi svo sem rétt nafn, fæðingarland og þess háttar.

Fleiri erlendir hópar afbrotamanna hafa náð fótfestu á Íslandi og lögreglu er kunnugt um að þeir misnota einnig skipulega móttökukerfi og félagslega aðstoð sem starfrækt er hér á landi í því skyni að aðstoða fólk í raunverulegri neyð.