Það stefnir enn einu sinni í bjartan dag á höfuðborgarsvæðinu og á Suðurlandi og Vesturlandi. Hins vegar verður þungbúnara á norðausturlandi þó að dragi úr úrkomunni þar og fellur hún líklega sem skúrir eða jafnvel slydduél. Þetta segir í hugleiðingum veðurfræðings.
Hlýjast verður á suðvestur horni landsins og verður hitinn á bilinu 4 til 14 stig. Á Vesturlandi verður bjart með köflum en skúrir í öðrum landshlutum einkum síðdegis. Áttin er norðlæg 3-10 m/s en verður heldur hvassari á morgun.
Á morgun og á laugardag verður keimlíkt veður og verið hefur. Heldur hvassara verður þó á landinu eða 5-13 m/s. Bjart veður með köflum á Vesturlandi en skýjað í öðrum landshlutum.
Á sjómannadaginn sem er á sunnudaginn virðist ætla að vera þurrt um allt land þó að svöl norðanáttin ráði ríkjum. Sól sést þó ekki í kortunum.
Almennt séð er búist við talsvert kaldara veðri næstu vikuna en er yfirleitt á þessum árstíma.