„Besti dagur ársins“

„Besti dagur ársins, engin spurning,“ segir Ragnar Már Vilhjálmsson, markaðsstjóri Color Run, litahlaupsins, sem fór fram í fimmta skiptið í dag. Hann segir að stemmingin hafi aldrei áður verið jafn skemmtileg og góð í hlaupinu og í ár enda veðrið frábært og fullt af góðum skemmtiatriðum.

Uppselt var í hlaupið og tóku yfir átta þúsund manns á öllum aldri þátt. Engin tímataka er í hlaupinu heldur snýst það um gleði og er fyrst og fremst fjölskylduskemmtun. 

Hlaupið hófst og endaði á grassvæðinu við gatnamót Suðurlandsbrautar, Grensásvegar og Engjavegar, gengt Glæsibæ og neðan við Orkuhúsið á Suðurlandsbraut. Að sögn Ragnars er þetta í fyrsta skipti sem hlaupið fer fram í Laugardalnum og það hafi verið stórkostlegt. „Stemmingin hér er ólýsanleg,“ sagði Ragnar í viðtali við mbl.is en myndirnar lýsa best stemmingunni. Haraldur Jónasson, ljósmyndari mbl.is og Morgunblaðsins, fangaði stemminguna í litahlaupinu í dag.