Forsetaembættið tók forskot á sæluna með opnu húsi í tilefni 75 ára afmælis lýðveldisins á Bessastöðum í dag. Þangað lögðu margir leið sína, ungir sem aldnir, og fengu að skyggnast inn í vistarverur forsetahjónanna.
Til sýnis voru gamlar forsetabifreiðar sem vöktu mikinn áhuga og forvitni gesta. mbl.is hefur fengið staðfest að á morgun, þegar forsetinn heldur á Austurvöll í tilefni þjóðhátíðarinnar, verður fararskjóti hans enginn annar en Packard Sveins Björnssonar, árgerð 1942.
Dagskráin á Austurvelli á morgun hefst klukkan 11. Forsetinn mætir og leggur blómsveig að styttu Jóns Sigurðssonar og fjallkonan flytur sitt mál.
Annars tóku forsetahjónin á móti gestum í anddyrinu og buðu þá velkomna að taka hring um húsið. Sumir fengu myndir af sér með hjónunum við innganginn. Húsið var opið frá 13-16 í dag og var sú ráðstöfun hliðstæð þeim opnu húsum sem verða í ýmsum opinberum byggingum á þjóðhátíðardaginn á morgun, eins og Stjórnarráðinu, Seðlabankanum og Hafrannsóknarstofnun. Ekki er unnt að hafa slíkt á Bessastöðum á morgun vegna annarrar dagskrár forsetans.
Gestum var leiðsagt um aðsetur forsetans, meðal annars inn í bókhlöðuna.
Börnum var sagt frá sögu staðarins, sem er að rekja aftur til landnámstíðar, og sumir kíktu niður í fornleifakjallarann undir Bessastöðum.