Innlent | mbl | 18.6.2019 | 12:10 | Uppfært 13:09

Greiða miskabætur vegna Hlíðamáls

Frá mótmælum vegna Hlíðamálsins svokallaða fyrir utan lögreglustöðina við Hverfisgötu árið 2015. Mennirnir tveir voru ekki ákærðir vegna málsins og hafa farið í meiðyrðamál við bæði fjölmiðla og einstaklinga vegna frétta og ummæla sem féllu í umræðum á netinu. mbl.is/Árni Sæberg

Þær Oddný Arnarsdóttir og Hildur Lilliendahl Viggósdóttir voru í Héraðsdómi Reykjavíkur nú fyrir hádegi dæmdar til greiðslu miskabóta vegna ummæla sem þær létu falla um tvo menn vegna hins svokallaða Hlíðamáls. Ummæli sem þær viðhöfðu um mennina voru dæmd dauð og ómerk, en þær sökuðu mennina um þaulskipulagðar nauðganir.

Oddný þarf samkvæmt dómsorði héraðsdóms að greiða mönnunum 220.000 kr. hvorum um sig í skaðabætur fyrir ummæli sín og Hildur þarf að greiða mönnunum tveimur 150.000 krónur.

Frétt af mbl.is

Krefja þrjár konur um bætur

Hlíðamálið komst í hámæli og vakti nokkurn óhug í nóvember 2015 eftir að Fréttablaðið sló því upp á forsíðu að tveir menn sem grunaðir væru um hrottaleg kynferðisbrot í íbúð í Hlíðahverfi í Reykjavík, sem sögð var „útbúin til nauðgana“, hefðu ekki verið úrskurðaðir í gæsluvarðhald. Boðað var til mótmæla fyrir framan lögreglustöðina á Hverfisgötu í kjölfar þessa og voru þær Oddný og Hildur á meðal skipuleggjenda.

Frétt af mbl.is

Fellir niður Hlíðamálið

Rannsókn á meintum brotum mannanna tveggja leiddi aldrei til ákæru og var málið endanlega fellt niður með ákvörðun ríkissaksóknara í júní 2016, að sögn Helga Magnúsar Gunnarssonar vararíkssaksóknara sökum þess að málið þótti ekki líklegt til sakfellingar.

Síðan þá hafa fréttamenn 365, Hringbrautar og fleiri einstaklingar verið dæmdir til greiðslu skaðabóta fyrir ærumeiðandi ummæli gagnvart mönnunum tveimur vegna umfjöllunar um málið í fjölmiðlum og í umræðum á netinu og nú bætast þær Oddný og Hildur í þann hóp.