Elsti keppandinn 102 ára kylfingur

Það viðrar vel á þátttakendur Landsmóti UMFÍ, 50 ára og eldri, sem hófst í Neskaupstað í dag með keppni í boccía. Í boði eru um 20 keppnisgreinar og allskonar aðrar sem snúast um nýja hreyfingu sem færi gefst á að prófa. Fólki yngra en 50 ára stendur einnig til boða að keppa í nokkrum greinum. 

„Þetta er besta veðrið hér, suðvestan, skínandi sól og léttur andvari. Þegar ég fór að hita upp fyrir keppni í sundlauginni áðan sýndi mælirinn 23 gráður,“ segir Jón Hlífar Aðalsteinsson, íbúi í Neskaupstað og þátttakandi á mótinu. 

Endurfundir frjálsíþróttakappa frá fyrri tíð

Mjög algengt er að á mótinu hittist á nýjan leik fólk sem keppti í frjálsum og fleiri greinum á sínum yngri árum og endurtekur leikinn með barnabörnin á kantinum. Elsti keppandinn á mótinu verður 103 ára í ágúst, en hann ætlar að taka þátt í golfi.

Fram kemur í tilkynningu frá mótshöldurum að til að hjálpa þátttakendum að kæla sig fá þeir allir frítt í sundlaug bæjarins á meðan á mótinu stendur.

Um þrjú hundruð manns eru skráðir í næstum tuttugu keppnisgreinar. „Svo skemmtilegar greinar eru í boði á mótinu að þátttakendur hafa komið í þjónustumiðstöð mótsins í Verkmenntaskóla Austurlands og skráð sig í fleiri greinar en þeir ætluðu upphaflega að taka þátt í,“ segir í tilkynningu. 

Jón Hlífar Aðalsteinsson er einn fjölmargra keppenda á Landsmóti UMFÍ, 50 ára og eldri, sem fram fer í Neskaupstað um helgina. Jón Hlífar er hæstánægður með veðrið, enda varla annað hægt þegar sólin skín og hitamælirinn sýnir 23 gráður. Ljósmynd/UMFÍ

Þá er tjaldsvæðið í bænum að fylltast þó svo að allir þátttakendur séu ekki búnir að skila sér í hús. Af þeirri ástæðu varð að nýta tjaldstæði sem annars er notað á Neistaflugi um verslunarmannahelgar.

Meðal annarra greina sem keppt verður í í dag eru frjálsar, ringó og línudans. Þar að auki verður kynning á ringó, sjósund fyrir alla, zumba, fitness og síðar í dag verður mótið sett við hátíðlega athöfn.

• Blogga um frétt