Innlent | mbl | 4.7.2019 | 15:50

Borgarráð samþykkti deiliskipulag fyrir Stekkjarbakka

Á þessari þrívíddarmynd má sjá hvernig svæðið við Stekkjarbakka gæti litið út gangi hugmyndin um gróðurhvelfingarnar eftir, en þær eru meðal þess sem rætt hefur verið um í breyttu deiliskipulagi. Teikning/Landslag

Meirihluti borgarráðs Reykjavíkur samþykkti nýtt deiliskipulag fyrir Stekkjarbakka á fundi sínum fyrr í dag. Þetta staðfestir Dóra Björt Guðjónsdóttir, borgarfulltrúi Pírata, í samtali við mbl.is. Hildur Björnsdóttir, borgarfulltrúi Sjálfstæðisflokksins, segir að meirihlutinn hafi samþykkt uppbyggingu atvinnuhúsnæðis og bílastæða á svæðinu þrátt fyrir andstöðu Sjálfstæðisflokksins og hávær mótmæli íbúa og Hollvinasamtaka Elliðaárdals.

Í færslu sinni segir Hildur að Umhverfisstofnun hafi gert fjölþættar alvarlegar athugasemdir við uppbygginguna - meðal annars að rask verði á vatnasviði Elliðaánna og útivistarsvæðið skert verulega. Hún segir að þeim athugasemdum hafi ekki verið svarað og borgin ekki fundað með Umhverfisstofnun.

Frétt af mbl.is

Keyri málið áfram í skjóli sumarfrís

„Umhverfisáhrif framkvæmdanna skiptu meirihlutaflokkana engu. Við erum verulega sorgmædd vegna áformanna enda höfum við ítrekað lagt til friðlýsingu Elliðaárdalsins,“ segir meðal annars í færslu Hildar.

Fundargerð borgarráðs frá fundinum í dag hefur ekki verið birt og leitaði fréttastofa því til fulltrúa borgarráðs þessu til staðfestingar. Dóra Björt Guðjónsdóttir, fulltrúi Pírata í borgarráði, sagðist í samtali við mbl.is ekki getað staðfest þessa yfirlýsingu Hildar.

Frétt af mbl.is

Samþykktu deiliskipulag Stekkjarbakka

„Það var samþykkt deiliskipulag þar sem verið er að skipuleggja svæði í Elliðaárdalnum, ekki uppbygging á atvinnuhúsnæði heldur deiliskipulag fyrir mögulega uppbyggingu,“ segir Dóra Björt. Spurð hvort að sú mögulega uppbygging fæli meðal annars í sér atvinnuhúsnæði svaraði hún:

„Það er ýmislegt sem stendur til. Það er til dæmis skipulagt svæði fyrir garðyrkjufélagið og svo er gerð ráð fyrir gróðurhúsi. En það er auðvitað að uppfylltum skilyrðum í deiliskipulagi sem eru mjög ströng hvað varðar til dæmis ljósastýringu. Þessi tillaga er mjög breytt frá upphaflegri tillögu.“

Þá bætti hún við að svæðið væri í raun ekki í Elliðaárdalnum heldur upp á Stekkjarbakkahálsi og svæðið væri fyrir utan það útivistarsvæði sem stendur til að friðlýsa.