Heilbrigðisráðuneytið og félagsmálaráðuneytið hafa öðlast viðurkenningu fyrir að ná Grænum skrefum 3 og 4 samkvæmt áætlun verkefnisins Græn skref í ríkisrekstri.

„Grænu skrefin felast í litlum og stórum aðgerðum til að draga úr sóun og mengun og snúast um að efla vistvænan rekstur ríkisins á kerfisbundinn hátt,“ segir í frétt á vef Stjórnarráðsins. Grænu skrefin eru jafnframt liður í því að innleiða loftslagsstefnu Stjórnarráðsins sem samþykkt var á fundi ríkisstjórnarinnar 9. apríl síðastliðinn.

Öll ráðuneytin og Rekstrarfélag Stjórnarráðsins vinna að innleiðingu grænna skrefa í ríkisrekstri. Sem dæmi um verkefni sem hrint hefur verið í framkvæmd í ráðuneytum má nefna innleiðingu prentskýja sem draga úr pappírsnotkun, flokkun úrgangs, samgöngusamninga, aðstöðu fyrir hjólandi, tilboð um deilibíl, rafhjólatilraun og innkaup á ýmsum umhverfisvottuðum vörum.

Heilbrigðisráðuneytið og félagsmálaráðuneytið eru með aðsetur í sama húsi og hafa unnið saman að innleiðingu grænu skrefanna. Þess má einnig geta að þau hafa bæði hlotið gullvottun fyrir að vera hjólavænn vinnustaður.

Tengdar fréttir

Umhverfisvitund

Fanga losun frá stóriðju og nýta í eldsneyti

• BM Vallá og Kapp hlutu umhverfisverðlaun
• Carbfix hlýtur Nýsköpunarverðlaun Íslands
• Hætt við að Ísland nái ekki að uppfylla markmiðin
• Hvetja þingmenn að kynna sér Coda Terminal

» Fleiri tengdar fréttir

• Blogga um frétt