Aðeins 3.200 laxar hafa veiðst í sumar

Aðeins hafa um 3.200 laxar veiðst það sem af er laxveiðitímabilinu en 45.000 veiddust allt síðasta sumar.

Þótt lítillega hafi glaðnað yfir undanfarna daga, samkvæmt samantekt Landssambands veiðifélaga, er veiðin í flestum ám landsins, sérstaklega vestanlands, langt undir því sem venjulegt er á þessum tíma.

Sumarið er ekki búið og binda veiðimenn vonir við smálaxagöngur næstu daga, að því er fram kemur í Morgublaðinu í dag.

„Það eru komnar ákveðnar vísbendingar um að ekki séu líkur á stórveislu framundan. Það verða engin veiðimet slegin í sumar,“ segir Guðni Guðbergsson, sviðsstjóri ferskvatnslífríkis á Hafrannsóknastofnun. Hann segir að mælingar hafi lengi sýnt að árgangur laxanna sem áttu að bera uppi veiðina í sumar sé lítill.