Manninum bjargað af syllunni

Göngumanninum, sem setið hafði fastur á syllu í Goðahrauni á Fimmvörðuhálsi frá klukkan 18 í dag, hefur verið bjargað úr sjálfheldunni. 

Samkvæmt upplýsingum frá Davíð Má Bjarnasyni, upplýsingafulltrúa Landsbjargar, náðu björgunarsveitarmenn að koma manninum upp af syllunni nú klukkan hálftólf.

Unnið er að því að ná í hann hita og orku fyrir gönguna að bílum björgunarsveitanna, en hann er kaldur og hrakinn eftir rúmar fimm klukkustundir á syllunni í mikilli þoku. Manninum verður síðan ekið í Skóga.