Daníel Haraldsson, þjónustudýralæknir á Egilsstöðum, hefur aflétt smitvörnum á dýralæknastofu sinni, sem hann viðhaft frá því að grunur vaknaði í síðustu viku um að þangað hefði komið inn hundur sem var smitaður af parvó veiru.
Parvó smáveirusóttin er bráðsmitandi fyrir unga og óbólusetta hunda. Hundurinn, sem talinn er hafa verið smitaður var mikið veikur dó, og sendi Daníel sýni í greiningu hjá Keldum hjá Háskóla Íslands. Auk þess voru hundaeigendur beðnir um að koma ekki með hundana inn á dýralæknastofuna, heldur bíða með þá úti í bíl þar til athugað hefði verið nánar hvað amaði að þeim.
Fréttavefurinn Austurfrétt segir endanlegar niðurstöður rannsóknar á sýninu ekki enn liggja fyrir, en hefur eftir Daníel að líkur á parvó veirusmiti fara minnkandi. Ekki hafi komið upp nein önnur tilfelli og því hafi varúðarráðstöfunum verið aflétt að lokinni sótthreinsun.