Mjög hlýr loftmassi verður yfir landinu næstu daga og líklegt að einhver hitamet falli. Þetta kemur fram í hugleiðingum veðurfræðings en í dag er líklegt að hitinn fari yfir 25 gráður á Norðausturlandi.
Áttirnar í dag verða austlægar og suðlægar. Þurrt og bjart verður að mestu norðanlands en rigning og súld sunnanlands og einnig vestanlands síðar í dag.
„Hæsti hiti sumarsins til þessa mældist 12 júní á Skarðsfjöruvita eða 25.3 gráður og gaman að fylgjast með hvort hærri hiti muni mælast í dag,“ kemur fram í hugleiðingum veðurfræðings.
Hiti í dag verður á bilinu 12 til 25 stig, hlýjast á Norðausturlandi.
Á morgun lítur út fyrir að hiti fari yfir 20 gráður í flestum landshlutum, en mun svalara verður austantil á landinu og við Húnaflóa þar sem þokubakkar ráða ríkjum.
Talsverður óstöðugleiki verður í loftmassanum yfir suðvestanverðu landinu og aukast þá líkurnar á þrumuveðri með tilheyrandi hellidembum.