203-stjórinn opnar útibú í 101

„Ég er að opna skemmtistað, 203 baby. Austurstræti 3. Þannig að ég er minna í spa-inu núna,“ segir Herra Hnetusmjör. Tilkynningin kom með óhefðbundnu sniði: Herrann segir þetta í millikafla í nýja laginu sínu, sem kallast Vitleysan eins.

„Þetta er eitthvað alvöru dæmi,“ segir Herra í samtali við mbl.is.

Þetta verður hiphop-bar, með Versace-veggfóðri. „Þetta er svona nýtískuhiphop staður. Ekki þetta bakbokahiphop. Þetta er meira þetta 2 Chainz kjaftæði,“ segir Herra. 

Staðurinn er í hjarta 101 en ber nafn póstnúmers Hnetusmjörsins sjálfs, sem er honum svo kært: 203, Kópavogur. Ætli það sé ekki fáheyrt að öðru leyti, að póstnúmer skuli færa út kvíarnar. 

Barinn skal opinn langt fram á nótt um helgar. Hann verður staðsettur í Austurstræti 3, húsnæði fyrir ofan húsnæði Kebabhússins við Ingólfstorg. Þetta er við hliðina á The Drunk Rabbit.

Að opna bar eins og að gefa út plötu

„Þetta er búið að vera í vinnslu í eitt og hálft ár. Það var mikið sem þurfti að gera,“ segir Herra Hnetusmjör.

Lögð var áhersla á „almennilegt svið,“ sem samkvæmt Herra er mikilvægt fyrirkomulag fyrir „athyglissjúka menn sem mæta á klúbbinn á laugardagsnóttu, heyra lagið sitt og langar að stökkva upp á svið.“ Annað eins hefur komið fyrir.

Nú er unnið að því að afla opinberra leyfa til rekstrarins. Herra segir að stefnan sé sett á að opna núna í lok sumars. „Þetta er eins og þegar maður er að vinna í plötu. Maður vill ekki gefa upp dagsetningu fyrr en hún er tilbúin,“ segir hann.

Það eru vendingar í reykvísku næturlífi um þessar mundir. mbl.is sagði frá því fyrr í dag að Gummi Ben sé, um svipað leyti og þessi áform verða að veruleika, að opna sportbar í Naustinni, þar sem Húrra var áður.

Frétt af mbl.is

Gummi Ben bar þar sem Húrra var

Nýja lagið er annars ekki óvinsælt. Ekki er loku fyrir skotið að Hnetusmjörið skelli sér upp á svið við opnun og tali menn aðeins til inni á eigin skemmtistað, eins og hann er vanur að gera í tónlist sinni. 

• Blogga um frétt