Húsnæði útgerðarinnar IP og matvinnslufyrirtækisins IC Core á Fornubúðum við Hafnarfjarðarhöfn er gerónýtt. Aðrir hlutar hússins sem brann sluppu við annað en reykskemmdir.

Í þessum hluta byggingarinnar, þar sem bruninn átti upptök og olli mestum skaðanum, voru dýrar matvinnsluvélar. Eigandi hússins sagði við mbl.is fyrr í dag að sennilega hlypi tjónið á hundruðum milljóna, þó að ekkert verði fullyrt um það í bili. Hitt er ljóst, að allt sem var þarna inni er ónýtt.

Slökkviliðsmenn eru enn að slökkva í síðustu glæðunum í húsinu og um leið að fjarlægja rústirnar úr húsinu. Tæknideild lögreglunnar er mætt á svæðið en nokkur tími mun líða áður en hún tekur við vettvanginum, enda frágangur eftir.

Stórar vinnuvélar vinna að því að taka brunarústirnar frá.