Vestaravatn að hverfa eftir langvarandi þurrk

Ómótstæðilegur svipur litbrigða jarðar blasir við þegar flogið er í síðsumarblíðu yfir dalverpi, tjarnir og vötn á Suðurlandi.

Við Árbæjarhjáleigu í Holtum í Rangárvallasýslu liggja Vestaravatn og Miðvatn og er það fyrrnefnda nú nánast uppþornað, eins og stundum gerist í langvarandi þurrkatíð eins og verið hefur að undanförnu.

Fari að rigna verður vatnið þó fljótt að fyllast aftur, segja bændur á svæðinu. Veðurspáin fyrir næstu daga á Suðurlandi boðar sól og blíðu, en á Norðurlandi og Vestfjörðum má gera ráð fyrir rigningu.