Leit að líki belgíska ferðamannsins sem talinn er hafa fallið í Þingvallavatn í vikunni hófst að nýju klukkan níu í morgun og stendur enn yfir. Í dag hefur leitin einungis farið fram með litlum kafbáti eða neðansjávardróna sem stjórnað er af tveimur mönnum í báti. Þetta segir Gunnar Ingi Friðriksson, formaður svæðisstjórnar björgunarsveita, í samtali við mbl.is.

Kafbáturinn sem notaður er í dag kemst á um það bil 70 metra dýpi að sögn Gunnars. Á slíku dýpi sé skyggnið þó slæmt sem gerir leitaraðilum erfitt fyrir. Leitin mun halda áfram eitthvað frameftir degi en hversu lengi fer eftir aðstæðum og veðri en það á að hvessa seinni parts dags.

Aðkomu björgunarsveita líklega lokið eftir daginn

Í gær voru kafarar, þyrla og sónartæki notuð við leitina en án árangurs. Leitin í dag hefur ekki skilað árangri enn sem komið er því leitarsvæðið gríðarlega stórt og mikið dýpi á sumum stöðum.

Gunnar Ingi býst við því að aðkoma björgunarsveita að leitinni ljúki eftir daginn í dag þar sem á morgun sé líklegt að stærri kafbátur, Gavia, verði notaður við leitina og menn frá framleiðslufyrirtæki hans, Teledyne Gavia muni sjá um leitina í samstarfi við lögregluyfirvöld.

Það hefur þó ekki verið ákveðið enn sem komið er, bætir Gunnar Ingi við að lokum.