Áætlað rúmmál skriðunnar sem féll í Reynisfjöru í gærmorgun er 25.000 rúmmetrar, en skriðan er sú þriðja sem fellur í fjöruna á 10 árum. 

Þetta kemur fram á vef Veðurstofunnar, en þar segir að grjóthrun úr Reynisfjalli daginn áður hafi greinilega verið undanfari stærri skriðu og að mikil mildi hafi verið að enginn hafi verið á staðnum þegar hún féll, en lögreglan hafði lokað svæðinu í kjölfar þess að maður höfuðkúpubrotnaði og ung stúlka slasaðist á fæti í grjóthruninu.

Mælingar á vettvangi benda til þess að meginþorri efnisins hafi komið úr móbergi í 60 til 100 metra hæð, en breidd skriðunnar var um 100 metrar og hljóp hún 50 metra frá rótum fjallsins út í sjó.

Ekki er vitað hvað kom skriðunni af stað en þekkt er að skriður falli úr Reynisfjalli, sérstaklega í austurhluta fjallsins. Minna er um ummerki um skriður og grjóthrun í suðurhlíð fjallsins við Reynisfjöru, en þar er úthafsaldan mjög öflug og hreinsar hratt ummerki um hrun.

Árið 2005 féll allstór skriða í Reynisfjöru, vestan við þá sem féll í gær. Þá varð hrun úr þaki Hálsanefshellis árið 2012/13, en engum varð meint af. Á síðustu 10 árum hafa skriðuföll átt sér stað þrisvar sinnum sem geta ógnað ferðamönnum. Einnig falla staksteinar sem valdið geta slysum  úr hlíðinni með reglulegu millibili.

Tengdar fréttir

Reynisfjara

Ferðamenn virða rauð viðvörunarljós að vettugi

• Mæla ekki með göngum undir Reynisfjall
• Hrösuðu í Reynisfjöru og komust í hann krappan
• Með göngugrind í flæðarmálinu í Reynisfjöru
• Myndavélar og tíu skilti í Reynisfjöru

» Fleiri tengdar fréttir

• Blogga um frétt