Brauðterturnar sem tóku þátt í brauðtertusamkeppni í Listasafni Reykjavíkur í dag komu til keppni í lögreglufylgd. Alls voru brauðterturnar 17 talsins sem tóku þátt í keppninni, að sögn Erlu Hlynsdóttur, sem var í dómnefnd keppninnar.

mbl.is/Eggert Jóhannesson

Lokað er fyrir umferð í miðborginni í tilefni Menningarnætur og því um langan veg fyrir þá sem áttu heiðurinn að brauðtertunum að ganga með þær í Hafnarhúsið. Aðstandendur keppninnar óskuðu eftir heimild til að þess að keppendur fengju að koma tertunum á keppnisstað með bifreiðum. Vel var tekið í beiðnina og bauð lögreglan á höfuðborgarsvæðinu fram aðstoð sína og fylgdi hún bílalestinni með terturnar á áfangastað. Allar komust terturnar heilar á höldnu á keppnissvæðið og þar beið dómnefndin tilbúin til að dæma í þrem­ur flokk­um; fal­legusta, frum­leg­asta og bragðbesta brauðtert­an og voru verðlaun veitt í hverj­um flokki.

Bragðbesta brauðtertan: Sólrún Sigurðardóttir: Hamingjuterta

Frumlegasta brauðtertan: Harðfisksambandið sem samanstendur af þeim Kristjáni Thors, Atla Stefáni Yngvasyni og Daníel Thors. Skreiðfáni Jörundar Hundadax

Fallegasta brauðtertan: Sveitasæla Berglind Haðardóttir

Lögreglan fylgdi brauðtertunum til keppni í Hafnarhúsinu. mbl.is/Eggert Jóhannesson

Að sögn Erlu stóð til að dómnefndin myndi byrja á að smakka og velja verðlaunahafa í flokkunum þremur og síðan fengju gestir og gangandi að bragða á kræsingunum en terturnar voru svo girnilegar og margt um manninn þannig að svo fór að einhverjir urðu frá að hverfa án þess að fá bita af brauðtertu.

Brauðtertukeppnin í dag átti að vera einstakur viðburður en að sögn Erlu er allt útlit fyrir að keppnin verði endurtekin að ári því viðburðurinn tókst framar öllum vonum og bæði keppendur og gestir farnir að ræða um tertur næsta árs. 

Auk Erlu voru þau Siggi Hall og Mar­grét Sig­fús­dótt­ir í dómnefndinni. Tanja Levý ásamt Valdísi Steinarsdóttur, í samstarfi við Brauðtertufélag Erlu og Erlu, stóðu fyrir keppninni og er Erla Hlynsdóttir ann­ar stofn­andi Brauðtertu­fé­lags­ins Erla & Erla sem nýt­ur mik­illa vin­sælda á Face­book.

Brauðterturnar voru hver annarri fegurri. mbl.is/Eggert Jóhannesson

Tengdar fréttir

Menningarnótt 2019

Flugeldasýning væntanlega að ári

• Mikið að gera hjá slökkviliðinu
• Tugþúsundir fylgdust með
• Mikil gleði í miðborginni
• Tekur hart á unglingadrykkju

» Fleiri tengdar fréttir

• Blogga um frétt