Utanríkisráðherra hefur fengið líflátshótanir
Setja bókamerki
Guðlaugur Þór Þórðarson utanríkisráðherra hefur fengið líflátshótanir á samfélagsmiðlum í tengslum við þriðja orkupakkann og eru þær nú á borði embættis ríkislögreglustjóra. Einnig hefur utanríkisráðuneytið gripið til öryggisráðstafana vegna hótananna. Fréttablaðið greindi frá þessu fyrr í dag, en ráðherra staðfestir þetta við mbl.is.
„Maður er ýmsu vanur en í þessu tilfelli er augljóst hver er ásetningurinn með þessari svokölluðu fjölmiðlaumfjöllun,“ sagði Guðlaugur Þór í samtali við Fréttablaðið og vísaði þar til fréttar sem birtist á vefmiðlinum Fréttatímanum í gær, þar sem því var haldið fram að Guðlaugur Þór og fjölskylda hans myndu hagnast persónulega á innleiðingu orkupakkans.
Sú umfjöllun, sem sett var fram undir fyrirsögninni „Skilar orkupakki 3 625 milljónum í vasa utanríkisráðherra?“, hefur farið víða á netinu síðan hún birtist í gær og vegna hennar hafa líflátshótanir verið settar fram á samfélagsmiðlum.
Guðlaugur Þór hafði áður vísað vangaveltum um að hagsmunir fjölskyldu hans réðu nokkru um stuðning hans við þriðja orkupakkann til föðurhúsanna. „Allt tal um að mín fjölskylda hagnist á Búlandsvirkjun, hvað þá um milljarða króna, er fjarstæðukennt,“ sagði ráðherra í yfirlýsingu vegna málsins í apríl síðastliðnum.
Guðlaugur Þór segir í samtali við Fréttablaðið að ráðuneytinu hafi verið ráðlagt að líflátshótanir beri að taka alvarlega og því hafi þær verið settar í farveg hjá ríkislögreglustjóra.
Var engin kristnitaka árið 1000?
Bjarni: „Útilokað að þetta geti gengið upp“
„Tímabil aukinnar eldvirkni“
Barn lést í árásinni
Beint: Ný ríkisstjórn tekin við völdum
Hrikalegt að heyra fréttirnar
