Talsverður mannfjöldi er samankominn á Austurvelli að mótmæla komu Mikes Pence, varaforseta Bandaríkjanna, til landsins. Fjölmargir með regnbogafánann meðferðis og mótmælaspjöld. Mótmælin hófust kl. 17.30 í dag undir yfirskriftinni partý gegn Pence. 

„Stefna hans og stjórnarinnar í Hvíta húsinu misbýður fjölmörgum Íslendingum. Fjöldi félagasamtaka hefur tekið höndum saman um að skipuleggja útifund sem verður vettvangur fólks til að tjá afstöðu sína til stefnu Trump-stjórnarinnar í friðar- og afvopnunarmálum, kvenfrelsismálum, málefnum hinseginfólks, á sviði umhverfisverndar og framkomu við flóttafólk.“ Þetta segir á facebooksíðu mótmælanna. 

Á meðal ræðumanna voru: Guttormur Þorsteinsson, formaður Samtaka hernaðarandstæðinga, María Helga Guðmundsdóttir, fv. formaður Samtakanna '78, Hildur Knútsdóttir, rithöfundur og umhverfisverndarsinni, Randi Stebbins mannréttindalögfræðingur og Isabella Rivera, innflytjandi frá Bandaríkjunum og aktívisti hjá No Borders.