Skipulag lögreglu hefur gengið sér til húðar og sameina á öll lögregluembættin í landinu að sögn Jóns F. Bjartmarz, yfirlögregluþjóns hjá embætti ríkislögreglustjóra. Hann segir að þannig væri hægt að koma í veg fyrir togstreitu og átök um fjármuni og að ekki sé til fé til að standast gæðakröfur.

Þetta kom fram í viðtali RÚV við hann í kvöld, en Jón vonast til þess að innan þriggja ára verði lögreglan orðin ein stofnun.  

Stjórnsýsluúttekt á ríkislögreglustjóra sögð tímabær

Stjórn Landssambands lögreglumanna lýsti þeirri skoðun í dag að ákvörðun dómsmálaráðuneytis um að fara fram á alhliða stjórnsýsluúttekt á embætti ríkislögreglustjóra væri löngu tímabær. „Um langt skeið hefur ríkt mikil óánægja meðal lögreglumanna með störf yfirstjórnar embættis ríkislögreglustjóra,“ sagði í ályktun sem stjórnin sendi frá sér.

Frétt af mbl.is

Vilja alhliða úttekt á embætti ríkislögreglustjóra

Jón F. Bjartmarz.

Fram kemur að óánægj­an sé m.a. til kom­in vegna fata­mála lög­reglu­manna sem hafi verið í ólestri en einnig vegna annarra mála, s.s. bíla­mála. „Ljóst er að lög­reglu­embætti hafa þurft að greiða háar fjár­hæðir til bílamiðstöðvar rík­is­lög­reglu­stjóra vegna öku­tækja lög­reglu, þrátt fyr­ir að þau séu jafn­vel úr sér geng­in, sbr. frétt­ir und­an­farna daga. Einnig hafa mál­efni sér­sveit­ar rík­is­lög­reglu­stjóra verið til um­fjöll­un­ar og styður stjórn Lands­sam­bands lög­reglu­manna er­indi þeirra sér­sveit­ar­manna sem sent var dóms­málaráðaneyti til um­fjöll­un­ar,“ seg­ir í álykt­un stjórn­ar­inn­ar. 

Lýstu furðu á ályktuninni

Embætti ríkislögreglustjóra lýsti yfir furðu á yfirlýsingu landssambandsins og meðal annars kom fram að stjórn landssambandsins hefði ekki haft neitt samband við embætti ríkislögreglustjóra til að ræða áhyggjurnar eða sett fram nokkur umkvörtunarefni.

Frétt af mbl.is

Tímabært að huga að heildarendurskoðun

„Lands­sam­band lög­reglu­manna á full­trúa bæði í fata- og búnaðar­nefnd og bíla­nefnd embætt­is­ins og hef­ur formaður­inn meðal annarra sjálf­ur setið í þeim. Full­trúi lands­sam­bands­ins hef­ur unnið með embætt­inu að útboði á ein­kenn­is­fatnaði fyr­ir lög­reglu­menn sem birt­ast mun inn­an skamms. Þegar ligg­ur fyr­ir að bílamiðstöð verður lögð niður og mik­il­vægt er að nýtt fyr­ir­komu­lag tryggi að áfram verði keypt traust og öfl­ug lög­reglu­öku­tæki,“ seg­ir í at­huga­semd rík­is­lög­reglu­stjóra.

„Rík­is­lög­reglu­stjóri hafði sjálf­ur frum­kvæði að því að óska eft­ir því við rík­is­end­ur­skoðanda að fram færi út­tekt á bílamiðstöð og áhrif­um þeirra breyt­inga sem ný lög um op­in­ber fjár­lög hafa haft á rekst­ur­inn. Rík­is­lög­reglu­stjóri tel­ur að tíma­bært sé að hugað verði að framtíðar­skip­an lög­reglu og skyn­sam­legt væri að stjórn­sýslu­út­tekt rík­is­end­ur­skoðanda myndi bein­ast að heild­ar­end­ur­skoðun lög­reglu­mála í land­inu,“ seg­ir enn­frem­ur.

Tengdar fréttir

Deilur innan lögreglunnar

Staðfestir launasamninga yfirlögregluþjóna

• Yfirlögregluþjónamál til Hæstaréttar
• Ömurlegt að standa í svona
• Yfirlögregluþjónar lögðu Sigríði aftur í launamáli
• Áfrýja dómi í launamáli yfirlögregluþjóna

» Fleiri tengdar fréttir

• Blogga um frétt